Қарағандыдағы RoboLand мерейтойлық халықаралық фестивалі немен таң қалдырады

Қарағандыда халықаралық RoboLand фестивалі оныншы рет өткізіліп отыр. Құрылғаннан бері ол техникалық шығармашылық пен инженерлік жаңалықтардың ірі алаңына айналды. Жыл сайын жаңа қонақтарды тартады.

Биыл фестиваль Қазақстан мен алыс және жақын шетелдерден 750-ден астам қатысушының басын біріктірді. Биыл алғаш рет Иран мен Болгариядан командалар келді. Сондай-ақ, Ресей, Өзбекстан, Қырғызстан, Әзірбайжанның жас робототехниктері өз шеберліктерін көрсетеді.

– Бұл фестиваль заманауи нарықтық жағдайда қажетті жаңа мамандарды өсіруге арналған алаңға, плацдармға айналды. Менің ойымша, қатысушылардың арасында болашақта сандық әлемде лайықты орын алатын таланттар көп. Баршаңызға табыс және сәттілік тілеймін. Бүгінгі жарыс – біліктілік пен дағдыны жетілдіру ғана емес, жаңа білім алу, жаңа танысу, – деп Қарағанды облысы әкімінің орынбасары Әлібек Әлденей Х Халықаралық RoboLand 2025 фестивалінің мерейтойлық қатысушыларын қарсы алды.

Екі күн бойы 17 санат бойынша 362 команда бақ сынасады.

Финалға шығу үшін 2000-нан астам бала іріктеу жарыстарына қатысып, 400-ден астам команда біліктілік іріктеуде бақ сынасты.

RoboLand 2025 бас төрешісі Есбол Аринов жаңалықтар туралы айтып берді. Ол өзі жаңа мәртебеде дебют жасады. Бұрын төрешілер командасында және ұйымдастыру штабында жұмыс істеген.

– Жыл сайын бағдарламада жаңа санаттар пайда болады. Биыл бұл Fishing technics жаңа жиынтықтарымен, «Жұптық теннис». Робототехника ұлттық ойындармен біріктірілген жарыстар бар. Өткен жылы «Теңге алу» енгізілсе, биыл «Садақ ату» қосылды. «Үлкен саяхат» санатында жаңа бастағандарға арналған жарыстар біріктірілді, онда роботтар бірнеше міндеттерді орындауы тиіс: сызық бойынша жүру, лабиринттен өту және кегельринг ойыны, – деп түсіндірді Есбол Аринов.

4–6 жас аралығындағы ең жас қатысушылар арнайы ойын жиынтығының көмегімен ғарыш айлағын салып, ғарышқа ұшуды имитациялайтын болады.

Шығармашылық санатта биыл командалар құтқарушы роботтарды таныстырады.

Жарысқа қатысушылардың арасында Ираннан келген команда да бар.

Иран делегациясының басшысы Надер Нобахттың айтуынша, жоба қауіпсіздікке қатысты: робот өрт және басқа да төтенше жағдайлар туралы хабарлауға қабілетті. RoboLand туралы ирандықтар интернеттен біліп, қызығушылық танытқан. Шақыру алған соң, қатысуға шешім қабылдаған. Халықаралық жарыстарда бірнеше рет болған: жарты жыл бұрын Қытайда екінші орын иеленген.

– Бұрын біз Қазақстанда осындай ауқымды іс-шаралар өтіп жатқанын білмейтін едік – бізді тауып, шақырды. Біз әлі күнге дейін таң қаламыз: фестиваль өте керемет! Тәжірибе біз үшін пайдалы.

Бір командамыз қатысады – 9 –13 жас аралығындағы екі бала. Лабиринттен өту жарысы өтеді, – деп бөлісті Болгарияның Варна қаласының жаттықтырушысы Сергей Сминтына.

Келушілер білім беру робототехникасы туралы көп нәрсе біле алады. Фестиваль алаңында заманауи жабдықтар мен технологиялардың көрмесі ұйымдастырылған.

RoboLand 2025 фестивалінің ұйымдастырушылары – Қарағанды облысының білім басқармасы, Білім беруді дамытудың оқу-әдістемелік орталығы, ҚР Білім және ғылым министрлігінің қолдауымен Kazdidac қауымдастығы.