6 мен 11 мамыр аралығында Шыңғырлау ауданында балалар мен жасөспірімдер арасында тоғызқұмалақтан Батыс Қазақстан облысының жекелей чемпионаты өтуде. Бұл турнир БҚО дене шынықтыру және спорт басқармасы, Шыңғырлау ауданы әкімдігі мен облыстық тоғызқұмалақ федерациясының қолдауымен ұйымдастырылуда.
Тоғызқұмалақ – жай ғана ойын емес. Бұл – қазақ халқының ежелгі интеллектуалдық дәстүрі, ұлттық мәдени мұрамыздың ажырамас бөлігі. Ол стратегиялық ойлау қабілетін, логиканы және шыдамдылықты дамытады. Жас спортшылар үшін бұл турнир өз шеберліктерін көрсетумен қатар, ата-баба мұрасымен тереңірек танысуға мүмкіндік береді.
Қазақстан Республикасының Президенті Қасым-Жомарт Тоқаев ұлттық ойындарды, соның ішінде тоғызқұмалақты сақтау мен дамыту – мәдени бірегейлікті нығайту мен ұлт бірлігін арттырудың маңызды құралы екенін бірнеше рет атап өткен болатын. Бұл ой ерекше түрде 2024 жылы Астанада өткен V Дүниежүзілік көшпенділер ойындары барысында айтылды. Онда тоғызқұмалақ түркі халықтарын біріктіретін зияткерлік ойын ретінде таныстырылып, қазақ мәдениетін халықаралық деңгейде насихаттауға септігін тигізді.
Аталған ойындар аясында тоғызқұмалақ 200 мыңнан астам адамның қатысуымен өткен онлайн турнирдің арқасында Қазақстанның рекордтар кітабына енді. Бұл – халық арасында ұлттық спортқа деген зор қызығушылық пен қолдаудың айқын дәлелі.
Сонымен қатар, 2023 жылы тоғызқұмалақ ЮНЕСКО-ның Адамзаттың материалдық емес мәдени мұралары тізіміне енді. Бұл – аталмыш ойының бүкіләлемдік мәдени құндылық ретінде мойындалуының дәлелі.
Осылайша, ұлттық спорт түрлерін дамыту туралы Президенттің сөздері – тоғызқұмалақ сияқты дәстүрлі спорт түрлерін сақтау мен танымал етудің, мәдени сәйкестікті нығайтудың және салауатты өмір салтын насихаттаудың стратегиялық бағытын көрсетеді. Сонымен бірге, бұл еліміздің халықаралық имиджін нығайтуға үлкен үлес қосады.
Шыңғырлауда өтіп жатқан бұл турнир дәстүр мен заманауилықтың үйлесім табатынын, жас ұрпақты интеллектуалдық биіктерге жетелеп, ұлттық құндылықтарды қадірлеуге баулитынын айқын көрсетіп отыр.
Ақпарат көзі : https://www.gov.kz/memleket/entities/bko-uvp/press/news/details/992849?lang=kk
Жауап қалдыру Жауапты болдырмау