Энтеробиоз – бұл паразитарлық аурулардың ішіндегі ең жиі кездесетін түрлерінің бірі, әсіресе мектепке дейінгі және бастауыш сынып жасындағы балалар арасында жиі таралады. Аурудың қоздырғышы – ұзындығы 1 см-ге дейінгі ұсақ ақ түсті құрттар – острица (ішекқұрт), олар адамның ішегінде паразиттік жолмен өмір сүреді.

Жарияланды:

13/05/2025 05:11

—

Автор:

Ауру контакт арқылы жұғады және өте жұқпалы. Острицалардың жұмыртқалары бірнеше сағат ішінде жетіліп, айналадағылар үшін қауіпті болып кетеді. Олар күнделікті қолданатын заттар, ойыншықтар, төсек және ішкиім арқылы, сондай-ақ кілем мен жиһазға қонған шаң арқылы тез таралады. Ауру көзі – острица жұқтырған адам ғана.

Көбінесе жұғу гигиеналық талаптарды сақтамаудан болады: қолды жумау, тырнақ тістеу немесе ойыншықты ауызға салу. Сондықтан балалар жоғары қауіп тобына жатады. Сонымен қатар, қайтадан өз-өзін жұқтыру салдарынан ауру бірнеше айға дейін созылып кетуі мүмкін.

Энтеробиоздың басты белгісі – анус аймағындағы қатты қышыну, әсіресе кешке және түнде. Бұл баланың мазасызданып, ұйқысының бұзылуына, зейіннің төмендеуіне және ашушаңдыққа алып келеді.

Жұқтыру мен қайта жұқтырудың алдын алу үшін:

Қолды сабындап жиі жуыңыз – әсіресе тамақ ішер алдында және дәретханадан кейін;

Тырнақты қысқа етіп алып жүріңіз, балалардың саусағын ауызға салмауын қадағалаңыз;

Үйде ылғалды тазалық жасап тұрыңыз, төсек жабдықтарын жиі ауыстырып, жуып, үтіктеп отырыңыз;

Ойыншықтарды, әсіресе жұмсақ ойыншықтарды дезинфекциялап тұрыңыз;

Балаларға гигиеналық дағдылардың маңызын түсіндіріңіз – бұл олардың денсаулығының кепілі.

Ауру белгілері байқалған жағдайда дәрігерге қаралып, қажет болса ем қабылдаған жөн. Егер барлық ұсыныстар мен алдын алу шаралары сақталса, энтеробиоз жақсы емделетін ауру.

Денсаулық – таза қолдан басталады!

Ақпарат көзі : https://www.gov.kz/memleket/entities/departament-kkbtu-akmolinsk/press/news/details/993830?lang=kk

Комментарии

Жауап қалдыру Жауапты болдырмау

Жауап қалдыру