Атыраулық полицейлер балаларға мерекелік шара ұйымдастырды

1 маусым – Халықаралық балаларды қорғау күніне орай Атырау облысы ПД қызметкерлері кішкентай ұл-қыздарына мерекелік көңіл-күй сыйлады.

Шара барысында бүлдіршіндер полиция қызметкерлерінің арнайы жасағының жаттығуларын тамашалып, патрульдік полиция батальонының арнайы қызметтік автокөліктері қандай мақсатта қолданылатындығы және қызмет бабында пайдалану ережелері кеңінен таныстырылды.

Сондай-ақ, балаларға ұжым атынан үрленген батут пен дайындалған тәттілер мен ойыншықтар табыс етілді.

Мерекелік іс-шарадан көңілді әсер алған балалар алғыстарын білдіріп, тұрғындар тыныштығын сақтауда абыройлы қызмет етіп жүрген ата-аналарымен мақтананын жеткізді.

– 1 маусым – Халықаралық балаларды қорғау күні. Адам өміріндегі ең үлкен бақыт – ұрпақ өсіріп, бала тәрбиелеу. Себебі бүгінгі бала – ертеңгі ел тірегі, ұлттың болашағы. Әрбір мемлекет өз келешегінің кемел болуы үшін балалардың амандығына, тәрбиесіне, құқықтарының қорғалуына айрықша мән береді. Өйткені ертеңгі күні ел тізгінін ұстайтын – осы өскелең ұрпақ. Балаларға бар мейірімін арнап, жан-жақты тәрбиелі, саналы азамат етіп өсіруге күш салатын қоғамның келешегі де жарқын болмақ. Осы айтулы мерекемен барша балақайларды шын жүректен құттықтаймын! – деді Атырау облысы ПД Тәрбие және кадр жұмысы басқармасының бастығы полиция подполковнигі Нұржан Шаеденов.