📌ОТЫРАР СЕКТОРЫНДА ТҰРҒЫНДАРМЕН КЕЗДЕСУ ӨТТІ

Бүгін Түркістан қалалық мәслихатының депутаттары Аманжол Данаханұлы мен Жәмилә Төреханқызы қала аумағындағы «Отырар» секторының тұрғындарымен көшпелі кездесу өткізді.

Кездесу барысында тұрғындар инфрақұрылымның жағдайы, көпқабатты тұрғын үйлердің сапасы, жеке тұрғын үй құжаттарын рәсімдеу, түнгі жарықтандыру, жаңа аумақтағы учаскелік полиция бекеті қажеттілігі, сондай-ақ көпқабатты үйлердегі ауыз су мәселелерін көтерді.

Халық қалаулылары көтерілген сұрақтарды тыңдап, нақты жауаптар берді. Әр мәселе жеке қаралып, тиісті мекемелермен бірлесіп шешім қабылдау жолдары түсіндірілді.

Депутаттар тұрғындардың ұсыныстарын назарға алып, кейбір мәселелерді қалалық мәслихат деңгейінде көтеріп, орындалуына ықпал ететіндіктерін жеткізді.

Ашық диалог форматында өткен кездесу қоғам мен билік арасындағы өзара байланысты нығайтып, сенімді арттыруға сеп болды. Мұндай кездесулер алдағы уақытта да тұрақты түрде жалғасатын болады.