Өскемен қаласында ұйымдастырылған 20 жасқа дейінгі спортшылар арасындағы ҚР жеке-командалық чемпионатында Түркістан ауыр атлетшілері жеңіспен оралды.
Спортшылар 2 алтын, 2 күміс жүлдеге ие болды. Атап айтқанда, 60 келі салмақта Алишер Тұрғанбай жұлқа көтеруден 120 кг, серпе көтеруден 145 кг салмақты бағындырып, қоссайыс нәтижесінде 265 келімен 1 орынға ие болды. Нәтижесінде, Халықаралық дәрежедегі спорт шебері дәрежесін орындады. 71 кг салмақ дәрежесінде Нұрасыл Арапбай жұлқа көтеруден 123 кг, серпе көтеруден 157 кг салмақты бағындырып, қоссайыс нәтижесінде 280 келімен алтын жүлдегер атанды.
Сонымен қатар 65 кг салмақта Жанасыл Арапбай жүлдегер болды. Ол жұлқа көтеруден 104 кг, серпе көтеруден 146 кг салмақты бағындырып, қоссайыс нәтижесінде 250 келі салмақты еңсеріп, күміс жүлдегер атанды. Нәтижесінде, спорт шебері дәрежесін орындады. 79 кг салмақ дәрежесінде Нұрмұхаммед Ирсали топ жарды. Ол жұлқа көтеруден 118 кг, серпе көтеруден 142 кг салмақты бағындырып, қоссайыс нәтижесінде 2 орынға ие болып, спорт шебері дәрежесін орындады.
Жалпы, аталған чемпионатқа еліміздің 16 өңірінен 150-ден астам спортшы қатысты. Соның ішінде Түркістан облысы құрамасынан 11 спортшы бақ сынаған болатын. Айта кетейік, Түркістан облысында қазіргі таңда Шымкент, Арыс, Ленгір қалалары мен Шардара ауданында ауыр атлетика залдары жұмыс істеп тұр. 8 жастан бастап аталған спорт түріне балалар қабылданады.
Жауап қалдыру Жауапты болдырмау