Басқарма басшысы психикалық денсаулық орталығының жұмысымен танысты

Басқарма басшысы психикалық денсаулық орталығының жұмысымен танысты

Бүгін Жамбыл облысы денсаулық сақтау басқармасының басшысы Сержан Назарбек Жамбыл облыстық психикалық денсаулық орталығының жұмысымен танысты.

Мекеме құрамында екі негізгі бөлім жұмыс істейді — наркологиялық және психиатриялық блоктар.

Сапар психиатриялық корпусты аралаудан басталды. Сержан Назарбек ғимараттардағы күрделі жөндеу жұмыстары мен іргелес аумақты абаттандыру барысымен танысты. Ол құрылыс жұмыстарының созылып кеткенін айтып, олардың уақытында аяқталмай жатқаны алаңдаушылық туғызатынын жеткізді. Басқарма басшысы бұдан әріге кешіктіруге жол берілмейтінін айтып, барлық құрылыс және абаттандыру жұмыстарын осы жылдың соңына дейін толық аяқтауды, сондай-ақ барлық құрылыс стандарттары мен заңнама талаптарының қатаң сақталуын тапсырды.

Психиатриялық блоктағы тәулік бойғы стационар сегіз бөлімшеде орналасқан, жалпы сыйымдылығы — 330 төсек. Алайда қазіргі таңда пациенттер жатқызылған жағдайлар өте қанағаттанарлықсыз деп танылды. Атап айтқанда, палаталарда заманауи төсектер мен қажетті жиһаз жетіспейді, ең негізгі қолайлылықтар да қарастырылмаған. Сержан Назарбек бұл жағдайды науқастар үшін мүлде қолайсыз деп бағалап, барлық анықталған кемшіліктерді шұғыл түрде жоюды тапсырды. Сонымен қатар, Республикалық психикалық денсаулық ғылыми-практикалық орталығының оң тәжірибесін зерттеп, үздік тәсілдерді енгізу арқылы науқастарға лайықты жағдай жасау ұсынылды.

Басқарма басшысы суицидке бейім және лудоманияға шалдыққан пациенттерге психиатриялық көмек көрсету мәселесіне де ерекше назар аударып, ондай азаматтарды уақтылы анықтау, бақылау және мамандар тарапынан тұрақты қолдау көрсету қажеттігін атап өтті.

Сонымен қатар, психикалық дертке қатысты әлеуметтік стигманы төмендету мақсатында Сержан Назарбек мекеменің атауын «Менталдық денсаулық орталығы» деп өзгерту мүмкіндігін қарастыруды ұсынды.
Сапар қорытындысында ол мекеме қызметін одан әрі жетілдіру және психикалық ауытқулары бар пациенттерге көрсетілетін медициналық көмектің сапасын тұрақты арттыру қажет екенін атап өтті.

Орталықтың бас дәрігеріне барлық анықталған кемшіліктерді жою жөнінде нақты тапсырмалар беріліп, олардың орындалу мерзімі белгіленді. Атқарылатын жұмыстар облыстық денсаулық сақтау басқармасының тұрақты бақылауында болады.

Ақпарат көзі : https://www.gov.kz/memleket/entities/zhambyl-densaulyk/press/news/details/1044009?lang=kk