Мектепке барамыз: мектеп формасы мен оқулықтарды дұрыс таңдау.

Жарияланды:

16/08/2025 21:15

—

Автор:

Күз жақындап қалды, демек, мыңдаған оқушы қайтадан партаға отырады. Дұрыс таңдалған мектеп формасы мен оқулықтар – бұл жай ғана жайлылық емес, сонымен бірге балаңыздың денсаулығының кепілі.

Мектеп формасын таңдағанда нені ескеру керек:

Мата құрамы. Ең жақсы таңдау – табиғи матадан тігілген форма, құрамында мақта мөлшері кемінде 50–70% болуы керек. Мұндай маталар ауа өткізгіштігі жақсы, аллергия мен ыстықтау қаупін азайтады. Толық синтетикалық маталардан аулақ болыңыз – олар теріні тітіркендіруі мүмкін және ылғалды сіңірмейді.
Таңбалаудың болуы. Әр киімде келесі мәліметтер болуы тиіс: өнім жасалған елдің атауы; өндірушінің атауы мен мекенжайы; бұйымның атауы; шығарылған күні (айы, жылы); нарықтағы бірыңғай айналым таңбасы; мата құрамы; бұйымға күтім жасау белгілері; өлшемі. Егер таңбалау жоқ болса, немесе ақпарат анық оқылмаса не қолжетімсіз болса – бұл тауардың қауіпсіздігіне күмән тудыратын белгі.
Пішінінің ыңғайлылығы. Форма қозғалысты шектемеуі, қыспауы және қажамауы керек. Еркін пішінді және реттелетін бөлшектері (белбеу, иықбау, резеңке) бар үлгілерді таңдаған жөн.

Оқулық таңдағанда нені ескеру керек:

Сатып алу орны. Оқулықтарды заңсыз (стихиялық) сауда орындарынан алмаңыз – мұндай жерлерде құжатсыз өнім алу қаупі жоғары. Мұндай оқулықтар тек тиімсіз ғана емес, қауіпті де болуы мүмкін, өйткені ресми бекітілген оқулықтар санитариялық-гигиеналық сараптамадан өтеді. Оларда қаріп көлемі, жол аралығы, қағаз бен бояудың сапасы ескеріледі.
Таңбалаудың болуы. Оқулықтың таңбалауында келесі мәліметтер болуы тиіс: өнім жасалған елдің атауы; өндірушінің атауы мен мекенжайы; бұйымның атауы; шығарылған күні (айы, жылы); нарықтағы бірыңғай айналым таңбасы.

Сәйкестікті растайтын құжаттар. Сіз сатушыдан өнімнің қауіпсіздігін растайтын құжаттарды талап етуге толық құқылысыз. Балалар киімі мен оқулықтарға мұндай құжат – сәйкестік сертификаты болып табылады.

Мектеп – баланың өміріндегі маңызды кезең. Ата-ананың міндеті – тек қажетті заттарды жинап беру ғана емес, сонымен қатар қауіпсіздікті қамтамасыз ету, сапалы тауарды таңдау.

Балаларыңызды қорғаңыз – таңдау жасағанда ойланыңыз!