Қазақстан Республикасында 2025 жылғы 1 тамызда ауыл шаруашылығы санағы басталды. Бұл санақ – аграрлық саланың нақты жағдайын айқындап, ауыл шаруашылығы туралы толық әрі шынайы деректер қорын қалыптастырады. Бұл науқанға Келес ауданы бойынша жалпы 6 036 агроқұрылым қатысуы тиіс. Бүгінгі жағдай бойынша ауданда 3 643 агроқұрылым санақтан өтіп, жалпы көрсеткіш 60,2 пайызды құрады. Осы және өзге де өзекті мәселелер Келес ауданының әкімі Жәнібек Ағыбаевтың төрағалығымен өткен аппараттық жиында талқыланды.
Жиында аудандық кәсіпкерлік және ауыл шаруашылығы бөлімінің басшысы Өмірсерік Алтынбаев ағымдағы жағдайды баяндап, жүргізіліп жатқан жұмыстар барысына тоқталды. Бөлім басшысының айтуынша, көрсеткіш облыстық деңгеймен салыстырғанда біршама төмен болғанымен, күнделікті жүргізіліп жатқан түсіндіру және тіркеу жұмыстарының нәтижесінде бұл айырмашылықты қысқарту мүмкіндігі бар.
Санақ кезінде бірқатар техникалық қиындықтар да тіркелген. Атап айтқанда, кейбір агроқұрылым иелері жеке кабинетке қайта кіргенде, жүйе санақ процесін толық аяқталды деп есептемей, деректерді базаға енгізбей қалдырған. Бұл жағдай 418 агроқұрылымның деректерін облыстық статистика есебіне енгізуге кедергі келтірген. Қазіргі таңда бұл мәселелер бойынша нақты шаралар қабылданып, түсіндіру жұмыстары жалғасуда.
Ауылдық округтер арасында санақтың төмен деңгейде өтуі негізінен Ошақты, Алпамыс батыр, Бірлесу, Ақтөбе, Қошқарата, Біртілек және Жүзімдік ауылдық округтерінде байқалған. Осы округтермен бірлесе отырып, жұмысты жандандыру үшін қосымша шаралар қолға алынуда.
Аудан әкімінің тапсырмасына сәйкес, ауыл шаруашылығы санағының сапалы әрі толық жүргізілуін қамтамасыз ету мақсатында арнайы ақпараттық-түсіндіру жұмыстары күшейтілді. Әрбір округте жауапты мамандар мен учаскелік инспекторлар онлайн тіркеу тәртібін түсіндіріп, тұрғындарға әдістемелік көмек көрсетуде.
Жиын соңында аудан әкімі Жәнібек Ағыбаев бұл санақтың стратегиялық маңызына ерекше тоқталып, тиісті бөлімдер мен ауылдық округ әкімдеріне жұмысты уақытылы әрі сапалы орындауды тапсырды. Сондай-ақ, агроқұрылым иелерін белсенділік танытуға шақырып, бұл науқанның ауылдық аумақтарды дамытуға бағытталған маңызды бастама екенін атап өтті.
Ақпарат көзі : https://www.gov.kz/memleket/entities/turkestan-keles/press/news/details/1056832?lang=kk
Жауап қалдыру Жауапты болдырмау