Жетісу облысының Төтенше жағдайлар департаментінде антитеррорлық қауіпсіздік мәселелері бойынша жұмыс кеңесі өтті. Оған ҰҚК өңірлік антитеррорлық орталығының өкілдері қатысты. Кеңес барысында ақпарат алмасу және хабарландырудың бірыңғай тәртібі бекітілді, басым нысандардың (мектептер, сауда орталықтары, вокзалдар, өмірді қамтамасыз ету объектілері) тізімі нақтыланды, сондай-ақ бірлескен оқу-жаттығулар кестесі келісілді.
Бұл шешімдер тұрғындар үшін не береді? Ең алдымен – жеделдік пен түсінікті тәртіп. Қауіп төнген жағдайда хабарламалар 112 қызметі, дауыс зорайтқыштар және ресми арналары арқылы жедел жетеді. Ғимараттардан эвакуация алдын ала дайындалған маршрутпен жүргізіледі: біреулер қосалқы шығу есіктерін ашады, өзгелері қимылдауы шектеулі адамдарға көмектеседі, тағы бір бөлігі тәртіпті қадағалап, дүрбелеңге жол бермейді. Мектептерде, сауда орталықтарында өтетін жаттығулар осы іс-әрекеттерді алдын ала пысықтауға мүмкіндік береді.
Тұрғындарға ескерту: сабыр сақтап, құтқарушылар мен нысан әкімшілігінің нұсқауларын орындаңыздар; 112 нөміріне тек нақты қажеттілік болса ғана қоңырау шалыңыздар. Күдік тудыратын заттарды байқасаңыздар, дереу хабарлаңыздар, өздеріңіз ұстамаңыздар. Қорғалатын нысандардағы қол жеткізу тәртібін сақтау да – жай формалдылық емес, жалпы қауіпсіздіктің бір бөлігі.
Қабылданған шаралардың басты мақсаты – қызметтердің үйлесімді әрекетін қамтамасыз етіп, уақыт үнемдеу. Себебі әрбір минут қымбат. Жетісу тұрғындары өзін кез келген жағдайда қауіпсіз сезінуі тиіс.
Жетісу ТЖД баспасөз қызметі
Ақпарат көзі : https://www.gov.kz/memleket/entities/emer-zhetisu/press/news/details/1057226?lang=kk
Жауап қалдыру Жауапты болдырмау