НҰРЖАН “ҚҰРМЕТ” ОРДЕНІНЕ ИЕ БОЛДЫ

Бүгін есімі Батыс Қазақстан өңіріне белгілі кәсіпкер Нұржан Абдрахман ҚР Президентінің Жарлығымен “Құрмет” орденімен марапатталды.

Орденді Республика күнінің қарсаңындағы салтанатты жиында Батыс Қазақстан облысының әкімі Нариман Төреғалиев табыс етті.

Нұржан – Сырым ауданының тумасы. Әкесі Мәулет ұзақ жылдар елдің қызметінде болды. Нұржанды ширатып, шынықтырған да ең бірінші әке мектебі еді. Мәулет ұлына еңбек пен адалдық табыстың қос қанаты екенін үйретті.

Шет тілін меңгерген әрі қаржыгер мамандығын алған Нұржан 1997-2011 жылдар аралығында Karachaganak Petroleum Operating B.V. (КПО) компаниясында түрлі жауапты қызметтер атқарды. Ірі басқарушылық шешімдерге жауапты тұлға ретінде қалыптасып, Ұлыбритания және Италия мемлекеттерінде біліктілікті арттыру бағдарламаларынан өтті.

Жерлесіміз 2011 жылдан бастап жеке кәсіпкерлікпен айналысады.

Өз қаражаты есебінен азаматтық бастама ретінде бірқатар әлеуметтік маңызы бар жобаларды іске асырып келеді. Атап айтқанда, Орал қаласындағы Зашаған кентінде «Шабыт» балалар шығармашылық орталығын, «Алтын Орда» мәдениет үйін, Деркөл шағынауданында «Айналайын» спорт кешенін салып, халық игілігіне тапсырды.

2024 жылы орын алған су тасқыны салдарынан баспанасыз қалған отбасыларға бірнеше тұрғын үй салып берді.

Орал қаласының Деркөл шағынауданына, Круглозерное кентіне мәдени нысандардың игілігін жеткізген де Нұрекең.

Нұржан Абдрахман биыл Жымпиты ауылынан заманауи ойын-спорт алаңын салып берді.

Міне, бизнестің әлеуметтік жауапкершілігін азаматтығымен астастырған Нұржан Абдрахман бүгін елінен лайықты марапат алды.

Бауыржан ШИРМЕДИНҰЛЫ,

Сырым ауданы