Сырым елінің абыройын асқақтатып, туған жер руханиятының өркендеуіне өлшеусіз үлес қосқан ардагер журналист, Қазақстан Жазушылар және Журналистер Одағының мүшесі, ҚР Президенті Қ.Тоқаевтың Құрмет грамотасының иегері, Батыс Қазақстан облысының «Үздік ақпарат қызметкері», Сырым ауданының Құрметті азаматы, Қ.Мырза Әлі атындағы төсбелгінің иегері, ақын Махмет Қажиахметов 70 жасқа толды.
Қаламынан қазына туған мерейгерді Сырым ауданының әкімі Жұмагелді Батырниязов қабылдап, ақынға аудан жұртшылығы атынан жылы лебізін білдірді. Ел руханиятының дамуына сіңірген еңбегін жоғары бағалап, иығына шапан жауып, аудан әкімдігі атынан құттықтау хат табыс етті.
Қабылдау барысында аудандық ардагерлер кеңесінің төрағасы Мүсірбек Айташев ақынның кеудесіне «Батыс Қазақстан облысының Құрметті ардагері» төсбелгісін тақты.
Сонымен қатар аудан әкімінің орынбасары Қайрат Төлепов, аудандық мәслихат хатшысы Шынар Дүйсенғалиева, «Аманат» партиясының аудандық филиалының төрағасы Талғат Дарғожиев және белгілі дәрігер Асхат Дүйсенғалиев ақынға жүрекжарды тілектерін арнап, ізгі ниеттерін білдірді.
Өмірін баспасөз бен поэзияға арнаған Махмет Мүтиұлы өзіне көрсетілген құрметке ризашылығын жеткізіп, туған елі мен жерлестеріне алғысын айтты.
Шынар ЯУДАҚЫЗЫ
Ақпарат көзі : https://www.gov.kz/memleket/entities/bko-syrym/press/news/details/1093328?lang=kk
Жауап қалдыру Жауапты болдырмау