РЕСПУБЛИКА КҮНІ МЕН ҚАЛА КҮНІНЕ АРНАЛҒАН МЕРЕКЕЛІК КОНЦЕРТ ӨТТІ

Бүгін Түркістан қаласында қала күні мен Республика күніне арналған «Түркістан – тарих тағылымы, егемендік – ел бақыты» атты мерекелік концерт өтті.

Концертке Түркістан қаласының әкімі Әзімбек Пазылбекұлы қатысып, қала тұрғындары мен қонақтарын мерекемен құттықтады. Әкім тұрғындармен тілдесіп, олардың ұсыныс-пікірлерін тыңдап, мерекелік кешті тамашалады.

Мерекелік бағдарлама қаланың мәдениет және өнер ұйымдарының қатысуымен жоғары деңгейде өтті. Кеш «Түркістан – тарих тағылымы, егемендік – ел бақыты» атты сахналық көрініспен басталып, көрермендерге ел тарихы мен тәуелсіздіктің қадір-қасиетін айшықтайтын әсерлі қойылым ұсынылды.

Сахна төрінде «Яссы» халықтық этнофольклорлық ансамблі ұлттық музыкалық шығармаларды орындап, «Яссы» халықтық би ансамблі қазақтың дәстүрлі билерін паш етті. Сонымен қатар, Мәдениет үйінің өнерпаздары мен өнер мектептерінің оқушылары заманауи және патриоттық әндер шырқап, көрермендерге көтеріңкі көңіл-күй сыйлады.

Мерекелік кеште «Ақжайық» музыкалық мектебі, Саз өнер мектебі және Балалар мен жасөспірімдер орталығының жас өнерпаздары қатысып, өздерінің шығармашылық қабілеттерін көрсетті.