Күрес түрлерінен Сербияның Нови-Сад қаласында өтіп жатқан 23 жасқа дейінгі әлем чемпионатында Қазақстан құрамасының мүшесі, түркістандық балуан Шұғыла Өмірбек тарихи жетістікке қол жеткізді.
Ол 55 келі салмақ дәрежесінде финалдық белдесуде бірнеше жас санатында Еуропа чемпионы атанған түркиялық Туба Демирді 12:8 есебімен жеңіп, әйелдер күресі тарихындағы Қазақстанның тұңғыш алтын жүлдегері атанды.
Жарыс барысында Шұғыла Өмірбек 23 жасқа дейінгі әлем чемпионатының күміс жүлдегері Михаэл Симонды (Молдова) 10:2, кадеттер арасындағы әлем чемпионатының күміс иегері Александра Войчилескуді (Румыния) 3:1, жартылай финалда 20 жасқа дейінгі Еуропа чемпионы Амори Андрихті (Германия) 2:0 есебімен ұтты.
Айта кетейік, 2017 жылдан бері ұйымдастырылып келе жатқан U23 әлем чемпионатында қазақстандық әйел балуандар алғаш рет финалдық белдесуге шығып, алтын медаль иеленді. Бұған дейін бұл жарыста еліміздің атынан ерлер арасынан 2023 жылы Сұлтан Әсетұлы (67 кг, грек-рим күресі) және 2024 жылы Ризабек Айтмұхан (97 кг, еркін күрес) топ жарған болатын.
Шұғыла Өмірбектің бұған дейінгі ең ірі жетістігі – 2024 жылы Иорданияда өткен U23 Азия чемпионатындағы күміс жүлдесі еді.
Мемлекет басшысы Қасым-Жомарт Тоқаев Шұғыла Өмірбекті әлем чемпионатындағы жеңісімен құттықтап, тарихи жетістігін атап өтті:
“Бұл – тарихи жеңіс. Өйткені еліміз мұндай халықаралық жарыста алғаш рет алтын медаль иеленіп отыр. Әр салада өзінің табандылығымен, еңбекқорлығымен табысқа жететін жастардың өсіп келе жатқаны қуантады. Шұғыланың алдағы уақытта да биік белестерді бағындыра беруіне тілектестік білдіремін!” – делінген Президенттің құттықтауында.
Түркістан қаласының спортшылары ел мерейін асырып, Қазақстан спортының жаңа тарихын жазуды жалғастыруда.
Ақпарат көзі : https://www.gov.kz/memleket/entities/turkestan-kalasy/press/news/details/1093607?lang=kk
Жауап қалдыру Жауапты болдырмау