Бұқар жырау ауданы Ботақара кентінің оқушысы Аяна Күніспекова Golden Time Talent халықаралық музыкалық байқауының жүлдегері атанды. Ол прима-қобыз сыныбында үшінші жыл білім алып жүр және Гагарин атындағы мектептің 6-сыныбында оқиды.
Жасына қарамастан, Аяна айтарлықтай жетістіктерге қол жеткізіп үлгерген. 11 жасынан бастап оқу үлгерімі жоғары, бірден екі мектепте үздік оқушы атанып жүр. Музыкадан бөлек, би өнерімен айналысады, мәдени іс-шараларға, байқаулар мен олимпиадаларға қатысып, аудандық, облыстық және республикалық деңгейлерде бірнеше рет жеңімпаз және жүлдегер атанған.
Биыл Аяна халықаралық деңгейде бағын сынап көруге шешім қабылдап, Golden Time Talent байқауына қатысты. Бұл – фестивальдер мен музыкалық жарыстарды онлайн және офлайн форматта өткізіп, ақтық сайысын Лондонда ұйымдастыратын әлемдік ірі платформалардың бірі.
Байқау бағдарламасына жас қобызшы екі шығарма дайындады. Алғашқысы – қазақтың белгілі композиторы Нұрғиса Тілендиевтің «Кел еркем, Алатауыңа» туындысы. Екінші нөмір ретінде италиялық композитор Джованни Бонончинидің «Rondo» шығармасы орындалды.
Аянаны байқауға прима-қобыз сыныбының оқытушысы, халықаралық байқаулардың лауреаты Шахназ Ильясова дайындады. Фортепиано партиясын концертмейстер Татьяна Сумская орындады. Дайындық жұмыстары шамамен үш айға созылған.
Байқау қорытындысы бойынша Аяна 100 мүмкін ұпайдың 81,7-сін жинап, онлайн форматта екінші орын иеленді және Лондонда өтетін офлайн кезеңге қатысуға шақырту алды. Жетістігімен оны Golden Time Talent және Global Talent Confederation жобасының президенті Инеса Била құттықтады.
– Біздің дәстүрлі қазақ аспабы мен ұлттық мәдениетіміздің шетелдік аудитория тарапынан қызығушылық тудыруы – үлкен мақтаныш. Әсіресе қазақ мәдениетінің әлемге танылып келе жатқаны маңызды. Біздің жастар өте талантты, сондықтан оларды жан-жақты қолдау қажет, – деп атап өтті тәлімгері Шахназ Ильясова.
Ақпарат көзі : https://www.gov.kz/memleket/entities/karaganda/press/news/details/1173351?lang=kk
Жауап қалдыру Жауапты болдырмау