Ақмола облысында полицейлер Бурабай курорттық аймағында демалысты брондаумен байланысты алаяқтық фактіні тергеп жатыр.
Құқық қорғау органдарының мәліметінше, зардап шегуші Көкшетау қаласының 63 жастағы тұрғыны. Ағымдағы жылдың ақпан айының басында оған белгісіз адам хабарласып, өзін Бурабай курорттық аймағының қонақ үйлерінің бірінің қызметкері ретінде таныстырған. Сұхбаттасушы демалысты тиімді бағамен брондауды ұсынып, төлемді Kaspi мобильді қосымшасы арқылы жасауға болатынын айтқан.
Оның сөзіне сеніп, ұсынысқа қызығушылық танытқан өтініш беруші турды брондауға келісіп, үшінші тұлғаның нөміріне 600 мың теңгеден астам ақша аударған. Ақшаға ие болған “қонақ үй қызметкері” байланысқа шығуды тоқтатқан.
Брондау туралы растауды да, ақшаны да қайтара алмаған ер адам 6 наурызда полицияға арыз берді.
Жедел-іздестіру іс-шаралары барысында полиция қызметкерлері күдіктінің жеке басын анықтады. Ол Шымкент қаласының 24 жастағы тұрғыны болып шықты. Жас жігіт жасаған ісін мойындады.
Қазіргі уақытта осы факт бойынша сотқа дейінгі тергеу жүргізілуде. Полицейлер күдіктінің әрекетінен зардап шеккен басқа азаматтардың бар-жоғын анықтауда.
Құқық қорғау органдары туристік маусым жақындаған сайын демалысты брондау, тұрғын үйді жалға алу және интернет арқылы турларды сатып алумен байланысты алаяқтық схемалардың саны артып келе жатқанын еске салады.
Алаяқтардан зардап шегіп қалмау үшін полицейлер бірнеше қарапайым ережелерді сақтауды ұсынады: демалысты тек қонақ үйлердің, туроператорлардың немесе тексерілген қызметтердің ресми сайттары арқылы брондау, белгісіз адамдардың жеке шоттары мен телефон нөмірлеріне ақша аудармау, қонақ үй немесе туристік компания туралы ақпаратты тексеру, пікірлерді оқып, байланыс мәліметтерін нақтылау. Орташа нарықтық құннан айтарлықтай ерекшеленетін тым тиімді ұсыныстардан сақ болу қажет.
Тәртіп сақшылары азаматтарды демалысты жоспарлау кезінде қырағы болуға және интернеттегі күмәнді ұсыныстарға сенбеуге шақырады.
Ақпарат көзі : https://www.gov.kz/memleket/entities/mvd-akmola/press/news/details/1178867?lang=kk
Жауап қалдыру Жауапты болдырмау