Жетісу облысы Полиция департаментінің бастамасымен өңір аумағында Қазақстан Республикасының «Құқық бұзушылықтардың алдын алу туралы» Заңы аясында мобильді топтардың жұмысы енгізілуде. Бұл бастаманың негізгі мақсаты – қоғамда қауіпсіздік мәдениетін қалыптастыру, азаматтардың құқықтарын қорғау және құқық бұзушылықтардың алдын алу.
Іс-шаралар аясында мамандар виктимологиялық профилактика жұмыстарын жүргізуде. Яғни бұл – азаматтарды ықтимал құқық бұзушылықтардан қорғауға және олардың құқық бұзушылық құрбанына айналу қаупін азайтуға бағытталған жұмыс. Тұрғындарға қауіпсіз мінез-құлық қағидалары түсіндіріліп, тұлғааралық жанжалдарды бейбіт жолмен шешу тәсілдері үйретіледі, заңды өзін-өзі қорғау жолдары мен қауіп төнген жағдайда қолданылатын қорғану шаралары туралы ақпарат беріледі. Сонымен қатар азаматтарға құқықтық, психологиялық және консультативтік көмек көрсетіледі.
Жұмыстың маңызды бағыты – құқық бұзушылықтан зардап шеккен азаматтарды анықтау және қолдау көрсету. Осы мақсатта көмек көрсету жүйесін дамыту, сенім телефондары мен ақпараттық алаңдардың жұмысын жетілдіру, сондай-ақ заманауи профилактикалық тәсілдер туралы материалдарды кеңінен тарату көзделген. Сонымен бірге құқық бұзушылықтар жиі орын алатын орындар мен факторларға талдау жүргізіліп, қауіпсіздікті арттыру бойынша қосымша шаралар қабылдануда.
Пилоттық іс-шара Текелі қаласында өтті. Оған 50-ге жуық адам, оның ішінде құқық бұзушылықтан зардап шеккен азаматтар қатысты. Іс-шараны ұйымдастыруға Текелі қаласының полиция қызметкерлері, Жетісу облысының Спорт және мәдениет басқармасының, Денсаулық сақтау басқармасының өкілдері, Кризистік орталық, Психологиялық қолдау орталығы, сондай-ақ «Жанұя» отбасыны қолдау орталығының мамандары атсалысты.
Ақпарат көзі : https://www.gov.kz/memleket/entities/mvd-zhetysu/press/news/details/1179876?lang=kk
Жауап қалдыру Жауапты болдырмау