Абай облысында полицейлер тас жолда көлігі сынып қалған әйел адамға көмек көрсетті.

Семей–Ресей тасжолында әйел адам тізгіндеген Toyota маркалы автокөлік жолда сынып қалды. Көлік техникалық ақауға байланысты әрі қарай жүре алмай, жүргізуші жол жиегіне тоқтауға мәжбүр болған. Жолда жалғыз қалған жүргізуші полиция қызметкерлерінен көмек сұрап жүгінген.

Жақын маңда жүрген Патрульдік полиция ротасының қызметкерлері әйел адамның жақына жедел жетті. Полицейлер алдымен көліктің жағдайын тексеріп, оның техникалық ақауға байланысты қозғала алмай тұрғанын анықтады. Жол қозғалысы қарқынды учаскеде тұрған көлік басқа жүргізушілер үшін де қауіп төндіруі мүмкін болғандықтан, тәртіп сақшылары бірден көмек көрсету туралы шешім қабылдады.

Полиция қызметкерлері автокөлікті арнайы арқанның көмегімен тіркеп, оны сүйреп Семей қаласына дейін жеткізіп берді. Осылайша жолда қалып қойған жүргізушіге дер кезінде көмек көрсетіліп, қауіпсіз түрде қалаға жетті.

Жүргізушінің айтуынша, Ккөлігі күтпеген жерден істен шығып, жолда жалғыз қалған уақытта қатты алаңдаған.

«Жолда келе жатқанда көлігім аяқ астынан тоқтап қалды. Қайта-қайта оталдырмақ болғаныммен жүрмеді. Жолда жалғыз қалған соң біраз уайымдадым. Содан кейін полицияға хабарластым. Патрульдік полиция қызметкерлері тез арада келіп, жағдайымды түсініп, көмектесті. Көлігімді Семей қаласына дейін сүйреп апарып берді. Осындай көмектері үшін оларға үлкен алғысымды білдіремін», – деді жүргізуші.

Патрульдік полиция қызметкерлері жолда қалған азаматтарға көмек көрсету олардың күнделікті жұмысының бір бөлігі екенін атап өтті. Олар жүргізушілерге жолға шығар алдында автокөліктің техникалық жағдайын тексеріп алуды, ал жолда күтпеген жағдай туындаған кезде сабыр сақтап, полиция қызметкерлеріне немесе тиісті қызметтерге хабарласуды еске салады.

Айта кету керек, тәртіп сақшылары жол қозғалысының қауіпсіздігін қамтамасыз етумен қатар, түрлі қиын жағдайға тап болған азаматтарға тұрақты түрде көмек көрсетіп келеді. Осындай жедел әрекеттердің арқасында жолда қалған жүргізушілер дер кезінде қолдау алып, қауіпсіз жерге жеткізіледі.

Ақпарат көзі : https://www.gov.kz/memleket/entities/mvd-abay/press/news/details/1180564?lang=kk