Сәбит Мұқанов атындағы облыстық кітапханада Солтүстік Қазақстан облысы әкімінің әдеби қауымдастық өкілдеріне арналған стипендияларын тапсырудың салтанатты рәсімі өтті. Іс-шараға өңір зиялылары, ақын-жазушылар, журналистер мен студенттер қатысты. Кездесу Наурызнама онкүндігінің үшінші күні аясында ұйымдастырылып, сөз өнеріне құрметтің жарқын көрінісіне айналды.
Жиында сөз сөйлеген Солтүстік Қазақстан облысы әкімінің орынбасары Жүсіп Жұмағұлов жиналған қауымды үшінші күннің мерекесімен құттықтап, әдебиеттің қоғам өміріндегі айрықша орнына тоқталды.
«Бүгінгі шара – сөздің, шығармашылықтың және шабыттың мерекесі. Әдебиет қай кезеңде де қоғам өмірінде маңызды рөл атқарған. Көркем сөз арқылы халықтың ойы, сезімі, құндылықтары мен рухани бағдарлары беріледі. Кітап адамға әлемді, өзін және өмірдегі орнын тереңірек тануға көмектеседі», – деді Жүсіп Жұмағұлов.
Салтанатты жиында Солтүстік Қазақстан облысы ақындарымен, жазушыларымен және сөз өнерінің көрнекті өкілдерімен кеңінен танылғаны атап өтілді. Сондықтан әдебиет саласының өкілдерін қолдау өңірдің рухани және мәдени әлеуетін арттырудағы маңызды бағыттардың бірі ретінде қарастырылады. Ұйымдастырушылардың айтуынша, мұндай стипендиялар қаламгерлерге қолдау білдіріп, әдеби еңбектің беделін көтеруге бағытталған. Алдағы уақытта бұл бастама игі дәстүрге айналмақ.
Қазақстан Республикасының Құрметті журналисі, Солтүстік Қазақстан облысының Құрметті азаматы Жарасбай Сүлейменов бұл стипендиялар шығармашылық жетістіктері үшін табысталатынын атап өтті.
«Бұл стипендиялар шығармашылық табыстары үшін беріледі. Бүгін оны алатындардың барлығы – өңірімізге танымал тұлғалар, көптеген туындылар мен кітаптардың авторлары. Стипендия бір рет қана тағайындалады. Алдағы уақытта мұндай бастама жыл сайын өткізіледі деп жоспарланып отыр», – деді Жарасбай Сүлейменов.
Іс-шараның ерекше тұсы – соңғы сәтке дейін лауреаттардың есімдері құпия сақталды. Сондықтан залда ерекше толқу мен қызығушылық сезіліп тұрды. Тек марапаттау сәтінде ғана облыс әкімінің стипендиясына бес адам ие болғаны жария етілді. Олар – Зарқын Тайшыбай, Жақсыбай Самрат, Нұргүл Оқашева, Сағындық Рақымжан және Ирина Матвеева.
Стипендия иегерлерінің бірі – жазушы, журналист Жақсыбай Самрат. Ол мұндай қолдау жас қаламгерлер үшін де аса маңызды екенін айтты.
«Менің ойымша, мұндай құрмет пен қолдауды жас жазушыларға да көрсету керек. Бұл оларға шабыт беріп, үлкен мотивация болар еді. Осындай стипендияға ие болғаныма өте ризамын. Еңбегімізді бағалағандарыңызға рахмет», – деді Жақсыбай Самрат.
Сәбит Мұқанов атындағы облыстық кітапханада өткен салтанатты рәсім әдебиетке, шығармашылыққа және сөз иелеріне көрсетілген ерекше құрметтің айғағына айналды. Өңірде ақын-жазушыларды қолдау мәдени мұраны сақтау, қоғамдық ойды дамыту және жас ұрпақты рухани құндылықтарға баулудың маңызды тетігі ретінде қарастырылады.
Ақпарат көзі : https://www.gov.kz/memleket/entities/sko-sayasat/press/news/details/1183426?lang=kk
Жауап қалдыру Жауапты болдырмау