Жетісу облысы Сарқан ауданында орналасқан Көкжиде ауылы соңғы уақытта ерекше бастамасымен көпшіліктің назарын аударып отыр. Ауыл тұрғындары алкоголь өнімдерінен ерікті түрде бас тартып, бұл шешімді күнделікті өмір салтына айналдырды.
Алкогольге тәуелділік мәселесі қоғамда, әсіресе жастар арасында, өзекті болып қала беруде. Ішімдік адам денсаулығына ғана емес, қоғамдық тәртіпке, отбасылық құндылықтарға және әлеуметтік тұрақтылыққа да кері әсерін тигізеді.
Көкжиде ауылында бұл мәселе тұрғындардың ортақ келісімімен шешілді. Полиция қызметкерлерінің айтуынша, бастама ауыл ішінен туындап, тұрғындар арасында талқыланған. Көпшілік оны қолдап, нәтижесінде алкоголь өнімдерінен бас тарту туралы ортақ шешім қабылданды.
«Біз бірлікте болсақ, әр қиындықты жеңеміз», — дейді полиция қызметкері Медет Камалбеков, ортақ жауапкершіліктің маңыздылығын атап өтіп. Ауыл дүкендері алкоголь өнімдерін сатудан толықтай бас тартқан, ал бақылау тұрғындардың өздері тарапынан жүзеге асырылуда.
Жергілікті тұрғындардың айтуынша, бұл бастама қоғамдық тәртіптің жақсаруына оң әсерін тигізген. Ішімдікке байланысты құқық бұзушылықтар азайып, ауылда тыныштық пен тәртіп орнаған. Сонымен қатар, бұл жастарды дұрыс тәрбиелеуге және салауатты әдеттер қалыптастыруға ықпал етуде.
Қазақ ақыны Нұржан Қалқаманның:
«Тазалық — тәннің ғана емес, рухтың да күші»
деген сөзі осы бастаманың мәнін айқын көрсетеді. Ауыл ақсақалы да бұл пікірді қолдайды:
«Біз баламызға таза ұрпақ қалдыруымыз керек. Сол үшін алдымен өзімізден бастау керек».
Мамандардың пікірінше, алкогольді шамадан тыс тұтыну агрессияға, күйзеліске және түрлі әлеуметтік мәселелерге әкелуі мүмкін. Көкжиде тұрғындарының бастамасы халық денсаулығын сақтауға және өмір сапасын арттыруға бағытталған.
Бүгінде бұл ауыл бірлік пен саналы таңдаудың қоғамды өзгертуге қабілетті екенін дәлелдеп отыр. Көкжиде тәжірибесі Жетісу облысындағы өзге елді мекендерге үлгі бола алады.
#законипорядок #заңментәртіп #непьющеесело
Ақпарат көзі : https://www.gov.kz/memleket/entities/mvd-zhetysu/press/news/details/1184546?lang=kk
Жауап қалдыру Жауапты болдырмау