Жетісу облысының Ескелді ауданында полиция қызметкерлері алкогольді шамадан тыс пайдаланатын тұлғалар мен психикалық дерттері бар азаматтар арасында құқықбұзушылықтардың алдын алуға бағытталған кешенді профилактикалық іс-шаралар өткізді.
Негізгі назар түсіндіру жұмыстарына аударылды. Профилактикалық әңгімелесу барысында қатысушыларға алкогольдің зияны, оның денсаулық пен мінез-құлыққа кері әсері, сондай-ақ мас күйінде құқықбұзушылық жасағаны үшін жауапкершілік туралы ескертілді. Полицейлер қоғамдық тәртіпті сақтау — тек міндет қана емес, әрбір азаматтың қауіпсіздігінің маңызды шарты екенін атап өтті.
Есепте тұрған тұлғаларға ерекше көңіл бөлінді. Оларға құқықбұзушылық тәуекелдерін азайту және өмір салтын қайта қарау бойынша ұсынымдар берілді. Психикалық аурулары бар азаматтарға медициналық көмекке уақтылы жүгіну, емдеу тәртібін сақтау және жақындарының қолдауының маңыздылығы түсіндірілді.
Іс-шаралар аясында алкогольді шамадан тыс пайдаланатын ретінде есепте тұрған 18 тұлға тексерілді, сондай-ақ құқыққа қарсы әрекеттер орын алуы мүмкін орындар қаралды. Бұдан бөлек, қоғамға қауіп төндірмейтін психикалық дерттері бар екі адам бақылауда болды.
Жүргізілген жұмыстардың қорытындысы бойынша полиция қызметкерлері 5 ерекше талап енгізіп, 6 қорғау нұсқамасын рәсімдеді.
Полиция өкілдерінің айтуынша, мұндай іс-шаралар жазалау емес, құқықбұзушылықтардың алдын алуға және дер кезінде көмек көрсетуге бағытталған:
«Біздің міндетіміз — тек жасалған құқықбұзушылықтарға әрекет ету ғана емес, олардың алдын алу. Профилактика қылмыс деңгейін төмендетуге, қоғамдық тәртіпті сақтауға және ең бастысы — қиын жағдайға тап болған азаматтарға көмектесуге мүмкіндік береді», — деп атап өтті ведомство.
Жетісу облысында профилактикалық жұмыстар алдағы уақытта да жалғасады, өйткені жүйелі тәсіл мен әрбір жағдайға жіті назар аудару қауіпсіз әрі тұрақты қоғамдық ортаны қалыптастыруға мүмкіндік береді.
Ақпарат көзі : https://www.gov.kz/memleket/entities/mvd-zhetysu/press/news/details/1186385?lang=kk
Жауап қалдыру Жауапты болдырмау