Наурыз биыл тек мереке емес — ол жаңа форматта, жаңа тыныста көрініс табуда. Солардың ішіндегі ең ерекше, ең әсерлі алаңдардың бірі — Digital Nauryz. Бұл кеңістікке кірген сәттен-ақ уақыт пен кеңістік шекарасы жойылып, дәстүр мен технологияның үйлескен ғажайып әлеміне енесіз.
Кіреберісте көкке қалықтаған дрон Мемлекеттік Туды асқақтата көтеріп, жаңа Қазақстанның цифрлық болмысын айшықтайды. Ал сыртқы алаңда студенттердің қолымен жасалған ұлттық нақыштағы бұйымдар — өткеннің өрнегі мен бүгіннің шеберлігін үндестіреді.
Ақ орданың ішіне енгенде, сізді болашақ қарсы алады. Жасанды интеллект негізіндегі AI Dos қонақтарды жылы жүзбен қарсы алып, тілдесуге шақырады. Бұл — білім мен технологияның жаңа деңгейге көтерілгенінің айқын көрінісі.
Кеңістіктің жүрегінде — 3D-принтерде жасалған «Тайқазан». Оның жанында робот-келін иіліп сәлем беріп, бауырсақ ұсынып, ұлттық дәстүрді заманауи тілде сөйлетеді. Бұл көрініс — ғасырлар сабақтастығының символы.
Әрі қарай әр алаң — жеке бір әлем. Дрон симуляторында аспанға самғап, өзіңізді болашақ ұшқыш ретінде сезінесіз. VR-көкпар арқылы қазақ даласының дүбірін жүрегіңізбен түйсінесіз. Робототехника алаңында экологияны қорғауға бағытталған тың шешімдер ұсынылып, жас өнертапқыштардың ой-өрісі таңғалдырады.
Голографиялық қазақ хандары — тарихты тірілтіп, өткенді көз алдыңызға әкеледі. Ал 3D және лазерлік технологиялар аймағында қарапайым идеяның қалай нақты өнімге айналатынын көресіз — бұл нағыз цифрлық өндірістің көрінісі.
Сапардың соңында Digital Nauryz AI фото-аймағы сізді күтеді. Мұнда жасанды интеллект сіздің бейнеңізді ерекше стильге айналдырып, Наурыздың ұмытылмас естелігін сыйлайды.
Ақпарат көзі : https://www.gov.kz/memleket/entities/pavlodar-edu/press/news/details/1186974?lang=kk
Жауап қалдыру Жауапты болдырмау