Павлодар облысының оқушылары үшін көктемгі каникул жаңа мүмкіндіктер мен пайдалы тәжірибеге толы кезеңге айналды. Биыл түрлі іс-шаралармен 70 мыңнан астам оқушы қамтылып, демалыс мазмұнды әрі әсерлі өтті.
Мектептерде каникул қызықты да әртүрлі форматта ұйымдастырылды. Оқушылар ұлттық дәстүрлерді дәріптеген «Менің отбасымдағы Наурыз» онлайн-челленджіне қатысып, танымдық әңгімелер, зияткерлік ойындар мен тақырыптық кездесулер арқылы білімдерін кеңейтті.
Каникул күндері шығармашылық пен спорт үйлесім тапты. Бастауыш сынып оқушылары эстафеталар мен сурет байқауларына белсенді қатысса, жоғары сынып оқушылары жобаларын қорғап, олимпиадалар мен түрлі байқауларда бақ сынады. Сонымен қатар, осы кезеңде қорытынды аттестацияға дайындық мақсатында қосымша сабақтар мен консультациялар өткізілді.
Оқушылардың ерекше қызығушылығын «100 асық» ұлттық ойыны, табиғатқа арналған викториналар және «Менің отбасым» фотокөрмесі тудырып, олардың мәдениетке, табиғатқа және отбасы құндылықтарына деген қызығушылығын арттырды.
Каникул бағдарламасына заманауи әрі әлеуметтік маңызы бар форматтар да енгізілді. «Менің каникулым объективте: үздік фото» онлайн-челленджіне 300-ден астам оқушы қатысса, «Заңмен дос болайық» құқықтық квест-ойынына 2000-нан астам бесінші сынып оқушылары тартылды. «Ашық әлем» жасөспірімдер клубтарында 1000-нан астам балаға арналған үстел ойындары мен түрлі бос уақытты тиімді ұйымдастыру шаралары өтті.
Каникулдың жарқын сәттерінің бірі – білім беру сапарлары болды. Аққулы ауданының оқушылары Түркістан қаласына барып, тарихи-мәдени мұрамен танысып, білім көкжиегін кеңейтті.
Осылайша, көктемгі каникул оқушылар үшін тек демалыс уақыты ғана емес, білімге, жаңа әсерлерге және шабытқа толы жарқын кезеңге айналды.
Ақпарат көзі : https://www.gov.kz/memleket/entities/pavlodar-edu/press/news/details/1189893?lang=kk
Жауап қалдыру Жауапты болдырмау