Жетісу облысында 2026 жылғы 26–29 наурыз аралығында өткен «Қауіпсіз үй» жедел-профилактикалық іс-шарасының қорытындысы шығарылды. Оның мақсаты — қиын өмірлік жағдайға тап болған отбасыларды анықтау және тұрмыстық зорлық-зомбылық саласындағы құқық бұзушылықтардың алдын алу, соның ішінде кәмелетке толмағандарды қорғау.
Іс-шараға полиция қызметкерлері, жергілікті атқарушы органдардың өкілдері және үкіметтік емес ұйымдар қатысты. Мұндай формат әлеуметтік мәселелерді шешуде кешенді тәсілді қамтамасыз етуге мүмкіндік берді.
Жүргізілген жұмыс барысында 17 отбасы анықталып, оларға жан-жақты көмек көрсетілді — құқықтық, психологиялық, медициналық және жұмысқа орналасуға жәрдем берілді.
20 баяндама ұйымдастырылып, халықпен 35 кездесу өткізілді. Барлығы 3 мыңнан астам профилактикалық іс-шара жүзеге асырылды: тұрғын үйлер, аулалар және саяжай учаскелері тексеріліп, түсіндіру жұмыстары жүргізілді. Профилактикалық есепте тұрған 610 адам тұрғылықты жері бойынша тексерілді.
Іс-шара қорытындысы бойынша 1000-нан астам әкімшілік құқық бұзушылық анықталды, оның ішінде түнгі уақытта үйден тыс жүрген 121 кәмелетке толмаған, отбасылық-тұрмыстық қатынастар саласындағы 9 құқық бұзушылық және балаларды тәрбиелеу жөніндегі міндеттерді тиісінше орындамаудың 16 дерегі тіркелді.
Сонымен қатар 83 адам профилактикалық есепке алынып, 26 адам медициналық айықтырғышқа жеткізілді, екі кәмелетке толмаған уақытша бейімдеу орталығына жолданды.
«Профилактика — бұл ең алдымен көмек пен алдын алу. Маңыздысы — мәселені анықтап қана қоймай, адамға дер кезінде қолдау көрсету», — деп атап өтті Жетісу облысының полициясы.
Өткізілген іс-шара жүйелі және кешенді профилактикалық жұмыстың қоғамдық қауіпсіздік пен азаматтардың әл-ауқатын қамтамасыз етудегі негізгі құралдардың бірі болып қала беретінін айқын көрсетті.
Ақпарат көзі : https://www.gov.kz/memleket/entities/mvd-zhetysu/press/news/details/1191526?lang=kk
Жауап қалдыру Жауапты болдырмау