Павлодар облысының полицейлері заңды иелеріне 22 ұрланған ұялы телефонды қайтарды. Бүгінде мобильді телефон сән-салтанат бұйымы болудан қалып, күнделікті өміріміздің ажырамас бөлігіне айналды. Алайда гаджеттер әлі де қылмыскерлер үшін ең тартымды олжалардың бірі болып отыр.
Павлодар облысы Полиция департаментінің мәліметінше, ағымдағы жылдың үш айында өңірде 27 ұялы телефон ұрлығы тіркелген. Тәртіп сақшыларының жедел жұмысының арқасында олардың 22-сі заңды иелеріне қайтарылды.
Талдау көрсеткендей, мұндай қылмыстар көбіне жәбірленушілердің өз салғырттығынан орын алады — олар техникаларын оңай қолжетімді жерлерде қараусыз қалдырады. Мәселен, Павлодар қаласындағы сауда үйлерінің бірінде белгісіз адам Samsung смартфонын дүңгіршек сөресінен ұрлап кеткен. Тағы бір жағдайда Желтоқсан көшесіндегі пәтерден iPhone қолды болған.
Жедел-іздестіру шараларының нәтижесінде аталған қылмыстарға күдіктілер ұсталды. Қылмыстық істер процессуалдық шешім қабылдау үшін сотқа жолданды.
Мүліктің сақталуын қамтамасыз ету үшін полиция азаматтарға бейтаныс адамдардан, күмәнді комиссиялық дүкендерден немесе базарлардан «қолдан» телефон сатып алмауға кеңес береді. Қоғамдық орындарда сақ болып, техниканы қараусыз қалдырмау қажет. Сонымен қатар, жасөспірімдер үшін ұялы телефон — әшекей емес, ең алдымен байланыс құралы екенін есте ұстаған жөн.
— Қылмыстың алдын алған оны ашқаннан әлдеқайда жеңіл. Мүліктің сақталуы ең алдымен оның иесінің жауапкершілігіне байланысты, — деп атап өтті ведомствода.
Ақпарат көзі : https://www.gov.kz/memleket/entities/mvd-pavlodar/press/news/details/1192052?lang=kk
Жауап қалдыру Жауапты болдырмау