Биыл «Жасыл ел» еңбек жасағына шамамен 3 200 адамды жұмыспен қамту жоспарланып отыр

«Жасыл ел» бағдарламасын іске асыру мәселесі облыс әкімі Асхат Шахаровтың төрағалығымен өткен аппарат мәжілісінде қаралды.

Жастар саясаты мәселелері басқармасының басшысы Әлімбек Тұралиевтің айтуынша, «Таза Қазақстан» жалпыұлттық акциясы аясында жүзеге асырылып жатқан «Жасыл ел» бағдарламасы өңірде қарқынды дамып, жастарды жыл өте келе көбірек қамтып келеді.

Биыл еңбек жасақтарына шамамен 3 200 адамды тарту жоспарлануда. Оның ішінде 2 000 жас – көгалдандыру жұмыстарына, ал 1 200-і абаттандыру және құрылысқа араласады.

«Қазіргі таңда жасақтарда 170 адам жұмыс істеп жатыр. Ақтөбеде 30 жас орман шаруашылығында еңбек етуде, 100-ден астамы құрылыс алаңдары және абаттандыру жасақтарында, тағы 40 адам облыс аудандарында жұмыс істеуде. Жалақы мөлшері бағытқа байланысты 155 мыңнан 190 мың теңгеге дейін, бұл – ел бойынша ең жоғары көрсеткіштердің бірі. Бағдарламаға 16 мен 35 жас аралығындағы жастар, соның ішінде студенттер, оқушылар және жұмыссыз жастар тартылады», – деді Әлімбек Туралиев.

Мәселені талқылау барысында облыс әкімі мердігер ұйымдарының қатысуымен еңбек жасақтарының мүшелерін қаланы санитарлық тазалау жұмыстарына тартуды тапсырды.

«Жаз мезгілінде студенттерді жұмыспен қамту – жастар үшін алғашқы еңбек тәжірибесі, табыс табу және қажетті дағдыларды дамытуға жақсы мүмкіндік. Осыған байланысты «Жасыл ел» бағдарламасын жалғастыру қажет. Сонымен қатар жастардың құқықтарының сақталуына назар аударып, олардың бұзылуына жол бермеу керек. Бұдан бөлек, Ақтөбе қаласы мен аудан әкімдіктері санитарлық тазалық жұмыстарын ұйымдастыруға белсендірек қатысып, жастардың еңбек жасақтарымен тығыз байланыс орнатуы тиіс», – деп атап өтті облыс әкімі.