Қарақия ауданында экологиялық мәдениетті қалыптастыруға және қоршаған ортаның тазалығын сақтауға бағытталған «Таза Қазақстан» республикалық акциясы шеңберінде кең ауқымды сенбілік өтті. 4 сәуір күні ұйымдастырылған бұл игі шараға аудан тұрғындары, мемлекеттік мекеме қызметкерлері мен еріктілер белсене атсалысып, жалпы саны 550 адам жұмылдырылды.
Сенбілік барысында аудан аумағындағы елді мекендер мен қоғамдық кеңістіктерде тазалық жұмыстары қарқынды жүргізілді. Аталған іске 16 бірлік арнайы техника тартылып, нәтижесінде 68,5 тонна тұрмыстық қалдық сыртқа шығарылды. Бұл көрсеткіш өңірдің экологиялық ахуалын жақсартуға бағытталған жүйелі жұмыстың нақты нәтижесін аңғартады.
Сонымен қатар, акция аясында көгалдандыру жұмыстары да назардан тыс қалмады. Аудан аумағында 141 түп ағаш пен 30 дана гүл отырғызылып, табиғи ортаны жаңғыртуға және тұрғындар үшін қолайлы экологиялық кеңістік қалыптастыруға ерекше мән берілді.
Мамандардың айтуынша, мұндай шаралар тек қоршаған ортаны тазартумен шектелмей, қоғамда экологиялық жауапкершілік мәдениетін нығайтуға ықпал етеді. «Таза Қазақстан» акциясы алдағы уақытта да жалғасын тауып, ел аумағында тұрақты түрде ұйымдастырылмақ.
Қарақия ауданы әкімдігінің баспасөз қызметі
Ақпарат көзі : https://www.gov.kz/memleket/entities/akimat-karakiya/press/news/details/1194350?lang=kk
Жауап қалдыру Жауапты болдырмау