Астана қаласында өткен халықаралық «Kazakhstan Machinery Fair 2026» көрмесі аясында жастарды қолдауға бағытталған маңызды іс-шара ұйымдастырылды. «Корпоративтік тәлімгерлік» жобасын жүзеге асыру шеңберінде «Үміт Үзбеу» қоғамдық қоры, «Жас ұрпақ» КМҚК және директор Витрук Я.Г. атынан «Антарес» жеке кәсіпкерлігі арасында жасалған келісім негізінде «Жас қанат» жастар үйінің тәрбиеленушілеріне арналған тәжірибеге бағытталған көшпелі бағдарлама өткізілді.
Осы бағдарлама аясында тәрбиеленушілер Орталық Азиядағы ең ірі салалық алаңдардың бірі саналатын халықаралық көрмеге қатысып, машина жасау, дәнекерлеу технологиялары және металл өңдеу салаларындағы соңғы жетістіктермен танысты. Іс-шара жетекші өндірістік кәсіпорындар, заманауи жабдық өндірушілер, бизнес өкілдері мен сарапшылар бас қосқан кәсіби орта ретінде ерекше маңызға ие болды.
Көрмеге қатысудың басты мақсаты – жастардың кәсіби көкжиегін кеңейтіп, оларды инновациялық технологиялармен және өндірістегі заманауи үрдістермен таныстыру. Тәрбиеленушілер озық жабдықтардың жұмысымен танысып қана қоймай, инженерлік-техникалық шешімдердің практикада қалай жүзеге асатынын көзбен көріп, нақты түсінік алды.
Мұндай форматтағы іс-шаралар кәсіби бағдар берудің тиімділігін айқын көрсетеді. Дәстүрлі дәрістер мен әңгімелерден гөрі, нақты өндірістік ортаға ену арқылы алынған тәжірибе білімді тереңірек меңгеруге және мамандық таңдауға саналы көзқарас қалыптастыруға мүмкіндік береді.
Коммерциялық емес ұйымдар, білім беру мекемелері және бизнес құрылымдары арасындағы серіктестік жастарды әлеуметтендіру мен кәсіби өзін-өзі анықтауда маңызды рөл атқарады. Бұл бағыттағы жұмыстарды жүйелі түрде жалғастыру және кеңейту – болашақ мамандарды даярлаудың тиімді жолдарының бірі екені сөзсіз.
Ақпарат көзі : https://www.gov.kz/memleket/entities/pavlodar-edu/press/news/details/1194511?lang=kk
Жауап қалдыру Жауапты болдырмау