Алматы облысында жас ұрпақты отансүйгіштік рухта тәрбиелеуге бағытталған тағылымды іс-шара өтті. 7 сәуір күні ҚР Ұлттық ұланының №6654 әскери бөлімінде ұйымдастырылған кездесу 1995 жылы тәжік-ауған шекарасында қаза тапқан Ішкі әскерлер жауынгерлерінің ерлігін еске алуға арналды.
Іс-шараға Алматы облысы полиция департаментінің Тәлімгерлер және Ардагерлер кеңесінің мүшелері, Іле ауданының №38 және №7 орта мектептерінің «Жас сақшы» сынып оқушылары, ПД бастығының орынбасары полиция подполковнигі Д.С. Кутпанов, сондай-ақ Ұлттық ұланның әскери қызметшілері мен полиция өкілдері қатысты.
Кездесу барысында қатысушылар қаза тапқан жауынгерлерді бір минут үнсіздікпен еске алып, гүл шоқтарын қою рәсіміне қатысты. Бұл тағзым – ел тыныштығы жолында жанын қиған батырларға көрсетілген құрметтің белгісі болды.
Жиын барысында сөз алған Қазақстан Республикасы Ұлттық ұланы Бас қолбасшысының орынбасары, генерал-майор Қайрат Жарылқасынұлы Үмбетов пен ПД Тәлімгерлер кеңесінің төрағасы, генерал-майор С.Т. Нұрахметов жас буынға елге қызмет етудің маңызын атап өтіп, патриотизм мен жауапкершілік – әр азаматтың басты қасиеті екенін жеткізді.
Іс-шара аясында «Жас сақшы» сынып оқушыларына арнайы экскурсия ұйымдастырылып, олар Ұлттық ұланның қызметімен танысты. Оқушылар заманауи техникаларды, оның ішінде ұшқышсыз ұшу аппараттарын көріп, әскери қызметтің ерекшеліктері туралы мағлұмат алды.
Ақпарат көзі : https://www.gov.kz/memleket/entities/mvd-alm/press/news/details/1197586?lang=kk
Жауап қалдыру Жауапты болдырмау