Бүгін Балқаш қаласына 89 жыл толды. Мерекелік күн экологиялық шаралармен басталды. Таңсәріден «Жастар» гүлзарында ересектер мен балалар жиналып, осында қала күніне орай ұйымдастырылған және «Таза Қазақстан» бағдарламасы аясында жүзеге асырылып жатқан «Балқаш — таза қала» акциясы бастау алды.
Гүлзар бір сәтке экологиялық идеялардың ашық алаңына айналды. Шеберлер қайта өңделген материалдардан жасалған бұйымдардың көрмесін ұсынды. Қала тұрғындарына ресурстарды қайта өңдеу мен қайта пайдалану мүмкіндіктері таныстырылды.
Тұрақты даму жолындағы заманауи шешімдердің бірі ретінде гидропондық қондырғылар ерекше қызығушылық тудырды.
«Табиғатты аяла» хореографиялық қойылымы мен жас табиғат қорғаушылардың үгіт бригадасының өнер көрсетуі шараға ерекше атмосфера сыйлады.
Балқаш қаласының әкімі Сапар Сатаев тұрғындарды құттықтап, ең үздік аула мен кәсіпорынды анықтауға арналған қалалық байқауларға бастау берді.
Осы жерден «Балқаштықтар таза қала үшін» атты ауқымды экологиялық шеру де жолға шықты. Қаланың орталық көшелерімен мыңдаған адам — оқушылар, студенттер, еңбек ұжымдары және бейжай қарамайтын тұрғындар жүріп өтті. Бірнеше кварталға созылған колонна таза қала — баршаға ортақ жауапкершілік екенін тағы бір мәрте еске салды.
Іс-шара жалпықалалық сенбілікпен жалғасты, ол «Достық» саябағында өтті. Мұнда да жүздеген балқаштық жиналды. Құрал-саймандарын қолға алған қатысушылар аллеяларды ретке келтіріп, аумақтарды қоқыстан тазалап, бірге жайлы қалалық орта қалыптастыруға үлес қосты.
Қоғам белсендісі Анар Адамбекова жерлестеріне үн қатып, барша тұрғындарды «Таза Қазақстан» бағдарламасына белсенді қатысуға шақырды:
— Қаланың тазалығы — баршамызға ортақ жауапкершілік. Әр адам өзінен бастауы тиіс: қоқыс тастамау, өзінен кейін жинау, табиғатқа және туған қаласына ұқыпты қарау. Балқашты бірге шын мәнінде таза, жайлы әрі көрікті қалаға айналдырайық — өзіміз үшін де, келешек ұрпақ үшін де.
Ақсақал Жұмабек Игембаев та жастарға туған жерге деген сүйіспеншілікті, еңбекке құрметті және тазалық мәдениетін сіңіру қажет екенін атап өтті.
Бүгін қоғамдық көліктерде және адамдар көп жиналатын орындарда қалаға танымал Балқаш жолбарысы маскотын кездестіруге болады. Ол тұрғындарға парақшалар таратып, тазалық әркімнен басталатынын еске салады.
Мерекелік бағдарлама мұнымен аяқталған жоқ. Жағалауда жас суретшілер фестивалі өтеді. М. Хамзин атындағы мәдениет сарайында «Кітап оқитын ұлт» жобасының қалалық кезеңінің қорытындысы шығарылып, ең көп кітап оқыған тұрғындар марапатталады. Кешке балқаштықтар мен қала қонақтары «Жастар» скверінде өтетін мерекелік концерт пен жастар дискотекасына шақырылады.
Балқаш қаласының туған күні 11 сәуірде атап өтіледі. Дәл осы күні, 1937 жылы, Прибалхашстрой жұмысшы кенті ресми түрде Балқаш қаласына айналды.
Ақпарат көзі : https://www.gov.kz/memleket/entities/karaganda/press/news/details/1198964?lang=kk
Жауап қалдыру Жауапты болдырмау