Маңғыстау облысы аумағында ағымдағы жылдың 10–15 сәуір аралығында «Қару» жедел-профилактикалық іс-шарасы өткізілуде.
Іс-шараның негізгі мақсаты — заңсыз қару айналымының алдын алу, атыс қаруын сақтау, тіркеу және пайдалану қағидаларының сақталуын күшейту, сондай-ақ осы саладағы құқық бұзушылықтардың алдын алу және жолын кесу.
Іс-шара барысында полиция қызметкерлері тіркелген қару иелерін тұрғылықты мекенжайы бойынша тексеріп, қаруды сақтау талаптарының, арнайы сейфтердің техникалық жай-күйінің және тиісті рұқсат құжаттарының болуына ерекше назар аударуда. Сонымен қатар, азаматтармен қарумен жұмыс істеу кезіндегі қауіпсіздік шаралары бойынша түсіндіру жұмыстары жүргізілуде.
Сондай-ақ заңсыз сақталған қару-жарақтарды, оқ-дәрілерді және жарылғыш заттарды анықтау, ерікті түрде тапсыру және тәркілеу бағытында жұмыстар жүргізілуде. Іс-шара аясында олардың заңсыз айналымға түсуіне жол бермеу бойынша тиісті шаралар қабылдануда.
Маңғыстау облысы Полиция департаменті азаматтарға заңсыз сақталған қару-жарақты ерікті түрде тапсыру қолданыстағы заңнамаға сәйкес жауапкершіліктен босататынын еске салады.
Полиция қару иелерін заң талаптарын қатаң сақтауға, қаруды уақтылы тіркеуден өткізуге және қайта тіркеу рәсімдерін уақытында орындауға шақырады.
Қауіпсіздік — баршамызға ортақ міндет!
https://www.instagram.com/reel/DW-9gjAjFEI/?utm_source=ig_web_copy_link&igsh=MzRlODBiNWFlZA==
Ақпарат көзі : https://www.gov.kz/memleket/entities/mvd-mangystau/press/news/details/1198998?lang=kk
Жауап қалдыру Жауапты болдырмау