Зияткерлік дода және жарқын болашақ: Абай облысында полиция қызметкерлері жарыс қатысушыларына есірткінің зияны туралы жеткізді

Абай облысында ұлттық зияткерлік мұраның айрықша үлгісі саналатын тоғызқұмалақ ойынынан жасөспірімдер арасында облыстық турнирдің ашылу салтанаты өтті. Ауқымды дода жас буынның ойлау қабілетін дамытып, стратегиялық пайымын шыңдауға бағытталған маңызды алаңға айналып отыр.

Шара барысында Абай облысы Полиция департаментінің қызметкерлері жас спортшылармен жүздесіп, оларға сәттілік тілеп қана қоймай, қоғам үшін өзекті мәселе – есірткі заттарының зияны туралы түсіндіру жұмыстарын жүргізді. Бұл бастама жасөспірімдердің санасында салауатты өмір салтын қалыптастыруға және құқық бұзушылықтың алдын алуға бағытталған маңызды қадамдардың бірі болды.

Абай облысы ПД Есірткі қылмысына қарсы іс-қимыл басқармасының аға жедел уәкілі полиция капитаны Үкіжанов Думан жастарға ерекше үндеу жолдады:

«Бүгінгі таңда жас ұрпақтың денсаулығы мен болашағы – мемлекет үшін ең басты құндылықтардың бірі. Спортпен айналысу, оның ішінде тоғызқұмалақ секілді зияткерлік ойындарға қызығушылық таныту – дұрыс таңдау. Есірткі заттары адам өмірін ғана емес, оның арманы мен мақсатын да жояды. Сондықтан әрқайсыңыз саналы түрде дұрыс жолды таңдап, өз болашағыңызға жауапкершілікпен қарауларыңыз қажет», – деді ол.

Турнир қатысушыларына мұндай мазмұнды кездесудің берері мол болды. Спорттық бәсекемен қатар тәрбиелік мәні жоғары іс-шара жасөспірімдердің рухани және әлеуметтік дамуына оң ықпал етті.

Айта кету керек, тоғызқұмалақ – тек ойын ғана емес, ұлттық құндылықтарды дәріптейтін, ұрпақтар сабақтастығын жалғайтын рухани мұра. Осындай жарыстар арқылы жас буын өз қабілеттерін шыңдап қана қоймай, ел болашағына жауапты тұлға ретінде қалыптасуға мүмкіндік алады.

Ақпарат көзі : https://www.gov.kz/memleket/entities/mvd-abay/press/news/details/1199960?lang=kk