2026 жылғы 16 сәуірде Қазақстан Республикасы Әділет министрлігінің қолдауымен Сәрсен Аманжолов атындағы Шығыс Қазақстан университетінде Еуропадағы қауіпсіздік және ынтымақтастық ұйымының (ЕҚЫҰ) ұйымдастыруымен «Еңбек қатынастарын құқықтық реттеу» тақырыбында семинар өтті.
Аталған іс-шара өңірдің заңгерлік қауымдастығы өкілдерін біріктірді. Семинарға облыстың адвокаттары, заң консультанттары, жеке сот орындаушылары, сондай-ақ С.Аманжолов атындағы Шығыс Қазақстан университетінің Бизнес және құқық Жоғары мектебінің және Қазақстан-Американдық еркін университетінің (ҚАЕУ) студенттері қатысты.
Қатысушыларға құттықтау сөзбен Шығыс Қазақстан облысының Әділет департаментінің басшысы Айгуль Туктыбаева және ЕҚЫҰ-ның Астанадағы Бағдарламалар офисінің адам өлшемі бөлімінің басшысы, АҚШ-тың лицензияланған адвокаты доктор Николас Мазик сөз сөйледі. Олар өз баяндамаларында еңбек қатынастарын құқықтық реттеуді жетілдірудің өзектілігін және мемлекеттік органдар, сарапшылар қауымдастығы мен білім беру ұйымдары арасындағы диалогтың маңыздылығын атап өтті.
Семинар аясында тәжірибелі заңгерлер мен ғалымдар баяндама жасады. Самал Бакытовна Серикбекова, заң ғылымдарының кандидаты, Астана қаласы адвокаттар алқасының адвокаты, М. Нарикбаев атындағы университеттің Құқық жоғары мектебінің профессоры, Қазақстан Республикасының еңбек заңнамасын еңбек дауларын шешуде қолданудың практикалық аспектілері туралы баяндама ұсынды.
Мереке Тлекович Габдуалиев, заң ғылымдарының кандидаты, Батыс Қазақстан облыстық адвокаттар алқасының адвокаты, облыстық мәслихат депутаты және «Еңбек» депутаттық тобының мүшесі, қызметкерлердің жекелеген санаттарының еңбек құқықтарын қорғау мәселелерін қозғап, құқық қолдану тәжірибесіндегі өзекті проблемаларға тоқталды.
Семинар өзінің өзектілігі мен практикалық маңыздылығын дәлелдеді. Мұндай іс-шараларды өткізу құқықтық сауаттылықты арттыруға, кәсіби тәжірибе алмасуға және азаматтардың еңбек құқықтарын қорғаудың тиімді тетіктерін дамытуға ықпал етеді.
Сілтеме: https://www.instagram.com/reel/DXM0oVVjKeE/?utm_source=ig_web_copy_link&igsh=MzRlODBiNWFlZA==
Ақпарат көзі : https://www.gov.kz/memleket/entities/adilet-shko/press/news/details/1202700?lang=kk
Жауап қалдыру Жауапты болдырмау