Атырау бекіре балық өсіру зауытында қорытпа, орыс бекіресі, шоқыр, пілмай және сүйрік балықтары өсірілуде. Қазір мамандар аналық балықтардан уылдырық алып, инкубация процесін іске асыруда,-деп хабарлайды Өңірлік коммуникациялар қызметі.
Технологиялық процесс бірнеше кезеңнен тұрады. Алдымен уылдырық ұрықтандырылып, 40–45 минутқа созылатын желімсіздендіру өңдеуінен өтеді. Одан соң арнайы инкубациялық аппараттарға орналастырылады.
Су температурасы 14°C болған жағдайда уылдырық шамамен бір аптада дамып, дернәсілдер пайда болады. Дернәсілдер 7–10 күн бассейндерде өсіріліп, кейін 30–45 күн бойы өсіру тоғандарында жетілдіріледі. Осы кезеңде олар шамамен 3 грамм салмақ жинайды.
Шаруашылықтың бас балық өсірушісі Жұпар Өтеулиева атап өткендей, кәсіпорындағы аналық-толықтыру үйірінде мыңнан астам балық бар. Мұндағы аналық балықтар судан ауланып әкелініп, бірнеше жылдар бойы қолдан өсіріледі. Қазір олар екінші-үшінші рет уылдырық беріп отыр.
Кейін жас балықтар табиғи ортаға — Жайық өзені арқылы Каспий теңізіне жіберіледі.
Бұл жұмыстардың негізгі мақсаты — бекіре тұқымдас балықтардың табиғи қорын сақтау және санын көбейту.
Ақпарат көзі : https://www.gov.kz/memleket/entities/atyrau/press/news/details/1204527?lang=kk
Жауап қалдыру Жауапты болдырмау