Өрт қауіпті кезеңде дала және орман өрттерінің туындау қаупін азайтуға мүмкіндік беретін уақтылы профилактикалық жұмыстардың маңызы зор.
«Өрттің бақылаусыз таралуына жол бермеу үшін өртке қарсы жырту жұмыстарын жүргізу қажет. Бұл шара өрт шыққан жағдайда өте тиімді болып табылады. Ол өрт шығу қаупі жоғары аумақтарда жүргізіледі», – деді Нұржан Өміржанов, Шығыс Қазақстан облысы Төтенше жағдайлар департаменті Мемлекеттік өрт бақылауы басқармасының бастығы.
Қандай нысандар өртке қарсы жырту арқылы қорғалады?
Орман және дала алқаптарында орналасқан шипажайлар, демалыс үйлері және басқа да сауықтыру мекемелерінің аумағы орман және дала өрттері кезінде оттың таралуына жол бермейтін минералдандырылған қорғаныс жолағымен қоршалуы тиіс.
Сондай-ақ ауыл шаруашылығы техникалары ұзақ уақыт тұратын орындардың айналасында, ауыл шаруашылығы алқаптарын қорғау мақсатында, елді мекендердің шекаралары бойында да жырту жұмыстары жүргізіледі. Орман және дала алқаптарына жақын орналасқан жер учаскелерінің барлық меншік иелері мен жалға алушылары өртке қарсы жырту жұмыстарын міндетті түрде жүргізуі тиіс. Жырту жолағының ені кемінде 4 метр болуы қажет.
Шығыс Қазақстан облысы Төтенше жағдайлар департаменті Мемлекеттік өрт бақылауы басқармасының мамандары тұрғындарға қауіпсіздік шаралары мен өрт қауіпті кезеңдегі іс-қимыл ережелерін түсіндіру бойынша алдын алу жұмыстарын алдын ала жүргізуде. Облыс бойынша рейдтік іс-шаралар ұйымдастырылған.
Қалыптасқан аптап ыстық пен құрғақ ауа райы өрттің үлкен аумақтарға лезде таралуына ықпал етеді. Өрттерді сөндіру шаруашылық қожалықтарының, ТЖД бөлімшелерінің, әкімдіктердің және ерікті өрт сөндірушілердің бірлескен күшімен жедел түрде жүзеге асырылады.
Мәселен, Усть-Таловка кенті елді мекенінде «Ауыл құтқарушылары» ерікті өрт сөндіру бекетінде күн сайын арнайы даярлықтан өткен қызметкерлер кезекшілікке түседі. Бекет Усть-Таловка кенттік округіне қызмет көрсетеді. Оның құрамына Усть-Таловка кенті, Заречное, Березовка, Половинка ауылдары және Коневка мен Рассыпное ауылдары кіретін Каменев ауылдық округі енеді.
Өрт сөндіру бекетінің қарауында 2 техника және тіркемелі мотопомпа бар. Қазақстан Республикасы Төтенше жағдайлар министрлігі тарапынан жарамды өрт сөндіру автокөлігі тегін берілген. Бекет жұмыс істеген уақыт ішінде шамамен 90 рет өрттерді сөндіруге және құрғақ шөптің жануын жоюға қатысқан. Бекеттің арқасында өрттің бастапқы кезеңінде жедел әрекет ету қамтамасыз етіледі.
«Ауылдық жерлерде өрт сөндіру бекеттерін құру – төтенше жағдайлар қызметінің басты басымдықтарының бірі. Біздің міндетіміз – тұрғындарды жедел қорғауды және төтенше жағдайларға шұғыл әрекет етуді қамтамасыз ету», – деп атап өтті Шығыс Қазақстан облысы Төтенше жағдайлар департаменті өкілдері.
Сонымен қатар, Шығыс Қазақстан облысы Төтенше жағдайлар департаменті тұрғындарды өрт қауіпсіздігі ережелерін қатаң сақтауға шақырады. Құрғақ әрі желді ауа райы және отқа ұқыпсыз қарау орны толмас салдарға әкелуі мүмкін.
Өрт қауіпті кезең басталғалы бері Шығыс Қазақстан облысы аумағында жалпы ауданы 370 гектарды қамтыған 34 дала өрті тіркелді. Өрттердің негізгі себебі – тұрғындардың отпен абайсыз әрекет етуі болды.
Ақпарат көзі : https://www.gov.kz/memleket/entities/emer-vko/press/news/details/1219057?lang=kk
Жауап қалдыру Жауапты болдырмау