Ақмола облысында тұрмыстық зорлық-зомбылықтың алдын алуға, әйелдер мен балалардың құқықтарын қорғауға, сондай-ақ қоғамда отбасындағы агрессияның кез келген көріністеріне нөлдік төзімділік қағидатын қалыптастыруға бағытталған “Отбасындағы зорлық-зомбылықсыз Қазақстан” кең ауқымды республикалық акциясын өткізу жалғасуда.
Полицейлердің ақпараты бойынша, акция шеңберінде өмірлік қиын жағдайға тап болған азаматтарға уақтылы көмек көрсетуге, сондай-ақ тұрмыста құқыққа қайшы мінез-құлыққа жол беретін адамдармен профилактикалық жұмысқа ерекше назар аударылуда.
Аймақ аумағында полиция қызметкерлері мен мүдделі мемлекеттік органдар, қоғамдық институттар өкілдерінің қатысуымен диалог алаңдары, дөңгелек үстелдер, халықпен кездесулер, флешмобтар, дәрістер мен профилактикалық әңгімелер ұйымдастырылды.
Бұрын тұрмыстық құқық бұзушылықтар мен қылмыстар фактілері тіркелген отбасылар құқық қорғау органдарының назарында. Полиция қызметкерлері атаулы тексерулер, профилактикалық әңгімелер жүргізіп, сондай-ақ зардап шеккендерге олардың құқықтары мен мемлекеттік қолдау шараларын түсіндіруде.
Полиция департаментінің хабарлауынша, қабылданып жатқан шаралардың арқасында өңірде отбасылық-тұрмыстық салада жасалатын қылмыстардың санын азайту үрдісі сақталуда. Жыл басынан бері 1500-ден астам отбасылық дебошир әкімшілік жауапкершілікке тартылып, 1750-ге жуық қорғау ұйғарымдары шығарылды.
Сонымен қатар, құқық бұзушылардың жәбірленушілермен байланысын уақытша шектеу тетігі белсенді қолданылады, бұл тұрмыстық жанжалдардың аса ауыр зардаптарын уақтылы болдырмауға мүмкіндік береді.
Бүгінгі таңда Ақмола облысында ресми түрде төрт дағдарыс орталығы жұмыс істейді, онда азаматтарға психологиялық, заңгерлік және әлеуметтік көмек көрсетіледі. Ағымдағы жылдың төрт айында дағдарыс орталықтарында 58 адам көмек алды, оның ішінде 21 әйел мен 37 бала.
Полицейлер тұрмыстық зорлық-зомбылық фактілері жайлы үндемеу ауыр зардаптарға әкелуі мүмкін екенін еске салады. Өмір мен денсаулыққа қауіп төнген жағдайда азаматтар дереу полицияға жүгінуі керек.
Ақпарат көзі : https://www.gov.kz/memleket/entities/mvd-akmola/press/news/details/1224535?lang=ru
Жауап қалдыру Жауапты болдырмау