“Түркістан облысында мүгедектік рәсімдеуге қатысты 19 күмәнді жағдай анықталуы” туралы.

МӘЛІМЕТ САҒАТЫ – “Түркістан облысында мүгедектік рәсімдеуге қатысты 19 күмәнді жағдай анықталуы” туралы.

Марат Аманғалиұлы Архаров – Халықты әлеуметтік қорғау саласындағы реттеу және бақылау комитетінің Түркістан облысы бойынша департаментінің басшы орынбасары.

Қазақстан Республикасы Еңбек және халықты әлеуметтік қорғау министрлігінің халықты әлеуметтік қорғау саласындағы реттеу және бақылау комитеті және оның аумақтық департаменттері мүгедектікті белгілеудің заңдылығына тұрақты мониторинг жүргізуде.

Мемлекет тарапынан мүгедектерді әлеуметтік қолдауға жыл сайын қомақты қаражат бөлінетіндіктен, атаулы әлеуметтік көмектің заңды әрі мақсатты пайдаланылуын қамтамасыз ету – басым бағыттардың бірі.

Медициналық-әлеуметтік сараптамаға ұсынылған медициналық құжаттарды талдау барысында бірқатар өрескел заң бұзушылықтар анықталды. Атап айтқанда, әртүрлі пациенттерге қатысты медициналық қорытындылардың бірдей мазмұнда дайындалғаны белгілі болды. Сонымен қатар, зерттеу нәтижелері, ауру тарихы және мамандар қорытындыларының қайталануы тіркелген.

Аталған фактілер медициналық құжаттаманы бұрмалау арқылы мүгедектік мәртебесін және әлеуметтік төлемдерді заңсыз алу әрекеттерінің белгілерін көрсетеді.

Бүгінгі таңда Түркістан облысында осыған ұқсас 19 жағдай анықталды.

Қазіргі уақытта барлық материалдар құқық қорғау органдарына жолданып, тиісті заңдық баға беру және тергеу жұмыстары жүргізілуде. Мәселе министрліктің ерекше бақылауында.

Қазақстан Республикасы Еңбек және халықты әлеуметтік қорғау министрлігі алдағы уақытта да әлеуметтік қорғау саласындағы заңнаманың сақталуын қамтамасыз ету және алаяқтық әрекеттердің жолын кесу бағытындағы жұмысты жалғастырады.

.