Жетісуда оқушылардың 94%-ы жазғы демалыспен қамтылады: өңірде 11 сауықтыру орталығы жұмыс істейді

2026 жылдың маусым айында 1–10 сынып оқушыларының 94%-ы (124 264 оқушы) жазғы демалыспен және пайдалы бос уақытпен қамтылады. Олардың қатарында ауылдық жерлерден келген 93 мыңнан астам бала бар. Қала сыртындағы лагерьлерде жалпы саны 10 350 бала демалады.
Жазғы маусымда өңірде 11 сауықтыру орталығы (6 мемлекеттік және 5 жекеменшік) жұмыс істейтін болады. Балалар лагерьлерінің ашылуын кезең-кезеңімен жүргізу жоспарлануда:
• 1-15 маусым аралығында (7 орталық): «Айналайын», «Көктөбе», «Алтын Шажа», «Бастау», «Эдельвейс», «Қарлығаш», «Жыланды этно кэмп»;
• 16-30 маусым аралығында (3 орталық): «Жалын», «Шағала», «Жансая».
Бүгінгінде 3 лагерь санитарлық-эпидемиологиялық қорытындыны алып үлгерді, қалғандары құжат тапсыру сатысында. Барлық орталық директорларына elicense.kz порталы арқылы лицензия алу талаптары түсіндірілді.
Демалысты ұйымдастыруға жергілікті бюджеттен 6 494 бала үшін 454 млн 580 мың теңге бөлінді (бір балаға 70 000 теңгеден). Тағы 201 бала «Балдәурен» және «Бөбек» республикалық орталықтарына жіберіледі. Демеушілер, ата-аналар және кәсіподақтар есебінен 3 655 бала демалады. Мемлекеттік сатып алу порталы арқылы 50 конкурстың 22-сі аяқталып, соның нәтижесінде 4 мыңға жуық балаға жолдама анықталды. Қалған 28 конкурс қарау сатысында тұр.
Жетісулық оқушылардың басым бөлігі жазғы каникулды мектеп жанындағы алаңдарда өткізеді. Олар үшін «Адал азамат» бірыңғай тәрбие бағдарламасы аясында бірнеше арнайы жоба іске асырылады:
• «Ұлттық құндылықтар»: ата-аналарды тарта отырып, «Әжелер мектебі» және «Әкелер мектебі» сияқты іс-шараларды өткізу.
• «Жазғы экрандар»: ашық аспан астында балалар мен ата-аналарға арналған танымдық фильмдер мен мультфильмдер көрсетілімі.
• «Жасыл клуб»: экологиялық сананы дамыту, табиғатты қорғау, қоршаған ортаға ұқыпты қарау және жаңа жасыл желектер құру.
• «Көрікті жерлер керуені»: 40 мыңға жуық бала үшін облыстың көрікті жерлеріне, ұлттық парктерге, музейлерге, сондай-ақ Алакөл, Балқаш және Қапшағай көлдерінің жағалауларына экскурсиялар ұйымдастыру.
Білім басқармасы басшысының орынбасары атап өткендей, облыста балалардың жазғы демалысын ұйымдастыру жұмыстары жүйелі түрде жүргізілуде және бекітілген жоспарға сай қатаң түрде жалғасуда. Балалардың мүддесін қорғау және пайдалы бос уақытты ұйымдастыру басты басымдық болып қала береді.

Ақпарат көзі : https://www.gov.kz/memleket/entities/dsek-zhetisu/press/news/details/1223894?lang=ru