21 мамыр — Мәдениет және өнер қызметкерлері күні. Осы мерекеге орай Әуезов ауданындағы Наталия Сац атындағы Мемлекеттік академиялық орыс балалар мен жасөспірімдер театрымен жақынырақ таныс болыңыздар.
Бұл театр — Қазақстандағы ең көне балалар театрларының бірі. Ол 1945 жылы белгілі режиссер, театр қайраткері Наталия Ильинична Сацтың бастамасымен құрылған. Театрдың алғашқы қойылымдарының бірі — Евгений Шварцтың «Қызыл телпек» спектаклі болды.
Театр тарихы Мұхтар Әуезов, Ғабит Мүсірепов, Сергей Эйзенштейн, Вера Марецкая, Николай Черкасов сынды көрнекті тұлғалармен тығыз байланысты. 1995 жылы театрға Наталия Сацтың есімі беріліп, сол жылы «академиялық» мәртебесі тағайындалды.
Бүгінде театр репертуарында 40-тан астам қойылым бар. Мұнда қазақ, әлемдік және орыс классикасының туындылары, сондай-ақ заманауи авторлардың эксперименттік қойылымдары сахналанады.
Театрдың басты көрермені — балалар мен жасөспірімдер. Сондықтан ұжым жас ұрпақтың рухани, эстетикалық және патриоттық тәрбиесіне ерекше көңіл бөледі. 2020 жылдан бастап театр жанында «Sats ComUnity» балалар театры студиясы жұмыс істейді. Онда 80-нен астам бала актерлік шеберлік, вокал, сахна тілі және заманауи би бағыттары бойынша тегін білім алады.
Қазіргі таңда театрдың негізгі ғимаратында жөндеу жұмыстары жүргізілуде. Осыған байланысты ұжым өз қызметін уақытша Оқушылар сарайында жалғастырып келеді. Соған қарамастан, театрдың шығармашылық өмірі тоқтаған жоқ: мұнда дайындық жұмыстары, қойылымдар, балаларға арналған сабақтар және көрермендермен кездесулер тұрақты түрде өтіп жатыр.
2025 жылы театр өзінің 80 жылдық мерейтойын атап өтті. Бүгінде Наталия Сац атындағы театр Қазақстанның мәдени өміріндегі маңызды өнер ордаларының бірі болып қала береді.
Ақпарат көзі : https://www.gov.kz/memleket/entities/almaty-auezov/press/news/details/1225862?lang=ru
Жауап қалдыру Жауапты болдырмау