Қарағандыда алғаш рет Халықаралық шағын театр формалары фестивалі өтеді

Жарияланды:

23/05/2026 11:50

—

Автор:

Қарағандылықтар мен қала қонақтарын I Халықаралық шағын театр формалары фестиваліне шақырады. Шығармашылық іс-шара 4–7 маусым аралығында Музыкалық комедия театры мен «Буратино» студиясының алаңдарында өтеді. Көрермендер эксперименталды театр мен камералық өнердің ерекше атмосферасына ене алады. Фестивальде Қазақстан, Ресей, Қырғызстан және Өзбекстан театр ұжымдары өз қойылымдарын ұсынады.

«Шағын театр формасы – әрбір деталь, әр қимыл мен сөз үлкен маңызға ие болатын жанр. Мұндай қойылымдарда көрерменнің назары пластика мен эмоцияға шоғырланады. Бұл – театр өнерін ықшам, бірақ өте әсерлі форматта көруге мүмкіндік», – дейді ұйымдастырушылар.

Бағдарламада сегіз спектакль бар. Жанрлары әртүрлі – ертегі мен драмадан бастап, моноопера мен стендапқа дейін қамтылған.

Қарағанды академиялық музыкалық комедия театры фестивальде екі қойылым ұсынады. Ашылу күні – 4 маусымда алаң иелері қуыршақтар қатысатын «Махаббат туралы аңыз» (16+) пластикалық спектаклін көрсетеді. Ал жабылу күні – 7 маусымда көрермендер «Жалғыз» (14+) моноспектаклінің премьерасын тамашалай алады.

Ресейдің Жуковский қаласынан келетін «Стрела» драма театры стендап-ретрит жанрындағы «Жалаңаш» (18+) спектаклін алып келеді. Қойылым Үндістандағы буддистік монастырьға материал іздеп барған журналист қыздың оқиғасына негізделген.

Қазақстан, Өзбекстан және Ресейдің қуыршақ театрлары балаларға арналған «Қоңыз, өрмекші және көбелек», «Алтын бұлбұл», «Элджернонға арналған гүлдер» спектакльдерін ұсынады.

Франсис Пуленктің «Адам дауысы» және Джан Карло Меноттидің «Телефон» моноопераларын Абай атындағы Қазақ ұлттық опера және балет театры сахналайды. 16 жастан асқан көрермендерге арналған қойылым жаппай телефондандыру мен адамдардың гаджетке тәуелділігі мәселесін қозғайды.

Владимир Набоковтың романы желісімен қойылған «Король. Дама. Валет» (14+) психологиялық драмасын Бішкектен (Қырғызстан) келген театр ұжымы көрсетеді. Басты кейіпкер – жас провинциал – сезімнің орнын суық есеп пен екіжүзділік басқан қауіпті ойынның қатысушысына айналады.

Фестиваль аясындағы барлық спектакльдерге кіру тегін.