Түн тыныштығы – тәртіп бақылауында: Абай облысының полицейлері түнгі уақытта жүрген 2174 жасөспірімді анықтады

Абай облысында кәмелетке толмағандардың қауіпсіздігін қамтамасыз ету бағытындағы профилактикалық жұмыстар жалғасуда. Жыл басынан бері облыс полицейлері түнгі уақытта заңды өкілдерінің еріп жүруінсіз ойын-сауық мекемелерінде және тұрғынжайдан тыс жүрген 2174 жасөспірімді анықтады. Балалардың ата-анасымен және асыраушыларымен полицейлер түсіндіру жұмыстарын жүргізіп, ткешкі уақытта жасөспірімнің тұрғын-жайдан тыс жалғыз кетуі аса қауіпті екенін ескертті.

Сондай-ақ, 236 жасөспірім кәмелетке толмағандарды бейімдеу орталығына орналастырылды.

Түн қоюланған сайын облыс көшелерінде полиция патрульдерінің бақылауы күшейеді. Себебі тәртіп сақшылары үшін әрбір жасөспірімнің қауіпсіздігі – басты міндеттердің бірі. Рейдтік іс-шаралар барысында полиция қызметкерлері ойын-сауық орындарын, компьютерлік клубтарды, саябақтар мен адам көп шоғырланатын аумақтарды тексеріп, жасөспірімдердің заң талаптарын сақтауына ерекше назар аударуда.

Абай облысының полициясы профилактиканы жазалаудан жоғары қояды. Өйткені тәртіп сақшыларының басты мақсаты – құқықбұзушылықты тіркеу емес, оның алдын алу. Осы бағытта ювеналды полиция қызметкерлері мектептермен және ата-аналармен тығыз байланыс орнатып, жасөспірімдер арасындағы құқықтық сауаттылықты арттыруға басымдық беруде.

«Бала түнде көшеде емес, отбасының жанында болуы керек» – бұл полиция қызметкерлері ұстанатын басты қағидалардың бірі. Себебі бақылаусыз қалған жасөспірім түрлі құқықбұзушылықтың құрбанына айналуы мүмкін. Ал дер кезінде жүргізілген профилактика көптеген келеңсіз жағдайдың алдын алады.

Түнгі қала тыныш көрінгенімен, тәртіп сақшылары үшін жұмыс бір сәтке де тоқтамайды. Өйткені әрбір рейдтің артында – бір баланың қауіпсіздігі, бір отбасының тыныштығы, қоғамның ертеңіне деген жауапкершілік тұр.

Ақпарат көзі : https://www.gov.kz/memleket/entities/mvd-abay/press/news/details/1226925?lang=ru