2026 жылғы 21-22 мамырда Жоғарғы Сотта «Баланың ең үздік мүдделері – сот төрелігінің негізі: халықаралық стандарттар және ұлттық сот төрелігі» тақырыбында халықаралық дөңгелек үстел өтті.
Іс-шара БҰҰБҚ (Біріккен Ұлттар Ұйымының Балалар қоры), ЕҚЫҰ (Европадағы қауіпсіздік және ынтымақтастық ұйымы) және «Құқық» қорының бірлесіп ұйымдастыруымен өткізілді. Алаң балалардың құқықтарын қамтамасыз ету және қорғау мәселелерін талқылау үшін судьяларды, мемлекеттік органдардың өкілдерін, құқық қорғаушыларды және әртүрлі елдердің сарапшыларын біріктірді.
Екі күндік форумның негізгі мақсаты – халықаралық құқықтық стандарттарды ескере отырып, ұлттық сот төрелігі жүйесінде «баланың ең үздік мүдделері» қағидатын іске асырудың бірыңғай тәсілдерін әзірлеу болды.
Дөңгелек үстел жұмысына Жоғарғы Соттың, Кассациялық соттың, жергілікті соттардың судьялары, Отбасы мәселелері жөніндегі уәкіл, Бала құқықтары жөніндегі уәкіл, Қазақстан Республикасының Бас прокуратурасының, Оқу-ағарту, Әділет, Ішкі істер министрліктерінің өкілдері, қоғамдық бірлестіктердің, адвокаттар және заң қоғамдастығының өкілдері қатысты.
Іс-шара аясында Қазақстан Республикасы Әділет министрлігінің Тіркеу қызметі және заңгерлік қызметтер көрсетуді ұйымдастыру комитетінің төрағасы Калимова Венера Қамысбайқызы «Қазақстан Республикасындағы баланың құқықтарын қамтамасыз ету тетіктері» тақырыбында баяндама жасады.
Сөз сөйлеу барысында балалардың тууын мемлекеттік тіркеу, азаматтық хал актілері саласындағы заңнаманы жетілдіру, азаматтығы жоқтықтың алдын алу тетіктерін енгізу және АХАТ қызметтерін цифрландыру мәселелері айтылды.
Кәмелетке толмағандарды зорлық-зомбылықтан, буллингтен және киберқауіптерден қорғау шараларына, сондай-ақ алимент өндіру және балалардың мүддесі үшін сот шешімдерінің орындалуын қамтамасыз ету мәселелеріне ерекше назар аударылды.
Сонымен қатар баяндамада балалардың құқықтарын қорғау кепілдіктерін күшейтуге, профилактикалық тетіктерді дамытуға және цифрлық кеңістікте балалардың қауіпсіздігін қамтамасыз етуге бағытталған адам құқықтары мен заң үстемдігі саласындағы Әділет министрлігінің іске асырылып жатқан жоспарлары көрініс тапты.
Дөңгелек үстелге қатысушылар балалардың құқықтарын қорғаудың өзекті мәселелерін талқылап, халықаралық тәжірибе мен үздік практикалармен алмасты. Бұл бастамалар Қазақстан Республикасында баланың құқықтарын іске асыру және қорғау тетіктерін одан әрі жетілдіруге бағытталған.
Ақпарат көзі : https://www.gov.kz/memleket/entities/adilet-krs/press/news/details/1228598?lang=ru
Жауап қалдыру Жауапты болдырмау