Солтүстік Қазақстан облысы бойынша Қылмыстық-атқару жүйесі департаментінің №48 мекемесінде өңірдің түзеу мекемелері қызметкерлерімен заңдылықты сақтау, қызметтік тәртіп және құқық қорғау институттарымен өзара іс-қимыл мәселелеріне арналған кездесу өткізілді.
Іс-шара барысында ашықтық пен қоғамдық бақылау жағдайындағы қылмыстық-атқару жүйесі қызметіне қойылатын заманауи талаптар талқыланды. Қазақстан Республикасының Азаптауларға қарсы конвенцияның Факультативтік хаттамасына қатысушы екені және елде Ұлттық алдын алу механизм институты жұмыс істейтіні атап өтілді.
Бүгінгі күні назар аударылатын мәселе тек ұстау жағдайлары ғана емес, сонымен қатар моральдық-психологиялық ахуал, этикалық нормалардың сақталуы, қарым-қатынас әдебі және адам қадір-қасиетіне құрмет көрсету екені ерекше атап өтілді.
Бақылаудың техникалық құралдарын пайдалану мәселесіне де айрықша назар аударылды. Үздіксіз бейнебақылау жүйелері мен жеке бейнетіркегіштер сотталғандардың да, қызметкерлердің де құқықтарын қорғаудың маңызды құралы болып табылатыны айтылды. Бейнетіркеу персоналдың әрекеттерін объективті бағалауға, жанжалды жағдайлардың алдын алуға және негізсіз айыптауларды болдырмауға мүмкіндік береді.
Кездесу аясында психологиялық қысым көрсетуге, қорқытуға, сондай-ақ белгіленген тәртіптен тыс қандай да бір «тәрбиелік әңгімелер» жүргізуге жол берілмейтініне ерекше назар аударылды. Қосымша түрде ерікті көмекшілердің қызметін бақылау және сотталғандармен процессуалдық емес байланыстарды болдырмау мәселелері талқыланды.
Өтініштер мен шағымдарды беруге арналған электрондық терминалдарға еркін қолжетімділікті қамтамасыз ету жанжалды жағдайлардың алдын алудың заңды тетігі ретінде маңызды екені атап өтілді. Сонымен қатар қызметкерлердің түрме жаргонын қолдануына жол берілмейтіні баса айтылды, себебі бұл кәсіби деформацияға әкеліп, қызметтік әдеп стандарттарын бұзады.
Кездесу соңында кәсіби ынтымақтастық құқық бұзушылықтарды жасыруға алып келмеуі тиіс екені айтылды. Әрбір қызметкердің міндеті – заңдылықты сақтау және құқыққа қайшы әрекеттердің алдын алу.
Іс-шараға СҚО ПД Өзіндік қауіпсіздік басқармасының, облыс прокуратурасының және ҚБК өкілдері қатысты.
Ақпарат көзі : https://www.gov.kz/memleket/entities/ombudsman-sko-oblysy/press/news/details/1231446?lang=ru
Жауап қалдыру Жауапты болдырмау