Жалған «отбасылық тариф» — алаяқтардың жаңа айласы ‼️Абай облысы Полиция департаменті азаматтарды интернет алаяқтарының жаңа тәсілі туралы ескертеді.

Соңғы уақытта алаяқтар әлеуметтік желілер мен мессенджерлерде «Отбасылық тарифке қосылыңыз, бос орын бар!» деген мазмұндағы хабарламалар таралуда. Олар азаматтарға ұялы байланыс қызметтерін арзан бағамен пайдалану мүмкіндігін ұсынып, сеніміне кіреді.

Үнемді тарифке қосылғысы келген азаматтар хабарлама авторларымен байланысқа шыққан кезде, алаяқтар арнайы сілтеме жібереді. Көп жағдайда бұл сілтемелер вирусты бағдарламалар орнатуға немесе жеке деректерді ұрлауға бағытталған.

Сілтемеге кірген сәттен бастап телефон құрылғысының жұмысы бұзылып, алаяқтар смартфондағы жеке мәліметтерге, банк қосымшаларына, әлеуметтік желідегі аккаунттарға және басқа да құпия ақпараттарға қол жеткізуі мүмкін.

Өзіңізді алаяқтардан қорғау үшін:

Бейтаныс адамдар жіберген сілтемелерге өтпеңіз;
Күмәнді ұсыныстарға сенбеңіз;
Жеке және банк деректерін ешкімге бермеңіз;
Қосымшаларды тек ресми дүкендерден жүктеңіз;
Телефоныңызға антивирустық қорғаныс орнатыңыз.

Егер күмәнді хабарлама алсаңыз немесе алаяқтардың құрбаны болсаңыз, дереу полицияға хабарласыңыз.

Сақ болыңыз! Сіздің қырағылығыңыз – қаржылық қауіпсіздігіңіздің кепілі.

Ақпарат көзі : https://www.gov.kz/memleket/entities/mvd-abay/press/news/details/1236481?lang=ru