Текелі қаласында Жетісу облысы полиция департаментінің есірткі қылмысына қарсы іс-қимыл басқармасы мен Жетісу облысының жастар саясаты мәселелері басқармасының өкілдері бірлесіп есірткі құралдарын насихаттайтын жазулар мен граффитилерді анықтау және жою жұмыстарын жүргізді.
Іс-шара барысында заңсыз интернет-ресурстарға сілтеме жасайтын және есірткінің заңсыз айналымын насихаттайтын инфографикалар мен жазулар өшірілді. Мұндай ақпараттар көбіне жастарды есірткі қылмысына тартудың құралы ретінде пайдаланылады.
Бірлескен шараның мақсаты – есірткінің таралуының алдын алу, жастарды зиянды ықпалдан қорғау және қауіпсіз қоғамдық ортаны қалыптастыру. Әрбір жойылған жазу – заңсыз ақпараттың таралуына қойылған тосқауыл және жастардың қауіпсіз болашағына қосылған үлес.
Ұйымдастырушылар жастарды салауатты өмір салтын ұстануға шақырып, есірткіге қатысты құқық бұзушылықтарға бейжай қарамаудың маңызын атап өтті.
Дереккөз: ҚР Ішкі істер министрлігінің ресми интернет ресурсы
Ақпарат көзі : https://www.gov.kz/memleket/entities/zhetysu-panfilov-sarybel/press/news/details/1238133?lang=ru
Жауап қалдыру Жауапты болдырмау