Абай облысында полиция дрондардың көмегімен Алакөл тасжолында бақылауды күшейтті

Абай облысы аумағында Алакөл көлінде туристік маусымының басталуына байланысты жол қозғалысы қарқынының артуы байқалуда. Осыған орай, өңірге келушілер легінің көбеюі Мақаншы–Жалаңашкөл автожолының жүктемесін едәуір күшейтіп, жол қауіпсіздігін қамтамасыз ету мәселесінің маңыздылығын арттырып отыр.

Осы жағдайда Абай облысы Полиция департаментінің қызметкерлері жол қауіпсіздігін қамтамасыз етудегі ерекше рөл атқаруда. Полиция тарапынан жол-көлік оқиғаларының алдын алу, құқық бұзушылықтарды дер кезінде анықтау және көлік қозғалысын тұрақты бақылауда ұстау мақсатында заманауи цифрлық технологиялар кеңінен қолданылуда. Соның ішінде әуеден бақылау жүргізуге арналған ұшқышсыз ұшу аппараттары (дрондар) тиімді пайдаланылуда.

Полиция қызметкерлері жүргізіп отырған әуеден бақылау барысында қарсы қозғалыс жолағына шығу, белгіленген жылдамдық режимін бұзу, қауіпті маневрлер жасау және өзге де жол қозғалысы ережелерін сақтамау деректерінің жолы кесілуде. Мұндай құқық бұзушылықтар тек жүргізушінің ғана емес, жолаушылар мен барлық жол қозғалысына қатысушылардың өмірі мен қауіпсіздігіне тікелей қауіп төндіреді.

Осы орайда Мақаншы аудандық полиция бөлімінің бастығы полиция подполковнигі Ковнашаров Адиль Слямканович жүргізушілерге үндеу жасап, жолдағы тәртіптің маңыздылығын ерекше атап өтті:

«Жол қозғалысы ережелерін сақтау – әрбір жүргізушінің міндеті. Алакөл бағытындағы көлік ағынының көбеюіне байланысты біз күшейтілген режимде жұмыс істеп, құқық бұзушылықтардың алдын алу үшін барлық қажетті шараларды қабылдап отырмыз. Әрбір жүргізуші өз өмірі мен өзгенің қауіпсіздігіне жауапты екенін ұмытпауы тиіс», – деді полиция подполковнигі.

Құрметті жүргізушілер! Жол – жоғары тәртіп пен жауапкершілікті талап ететін ортақ кеңістік. Бұл бағытта полиция қызметкерлері тарапынан жүргізіліп жатқан бақылау мен профилактикалық шаралар жолдағы қауіпсіздікті қамтамасыз етудің басты тетігі болып отыр.

Белгіленген жылдамдық режимін сақтау, қауіпті маневрлерден бас тарту және жолда мұқият болу – әрбір азаматтың міндеті. Әр сапардың қауіпсіздігі полицияның бақылау шараларымен қатар, жүргізушілердің жеке жауапкершілігіне де тікелей байланысты.

Ақпарат көзі : https://www.gov.kz/memleket/entities/mvd-abay/press/news/details/1242754?lang=ru