2026 жылғы 15 маусымда Қостанай қаласында Қостанай, Павлодар, Ақмола және Солтүстік Қазақстан облыстарының өкілдері арасында шахматтан «Senat Open» III Ашық кубогының жартылай финалы өтті.
Еске сала кетейік, «Senat Open» турнирінің бастамашысы – Қазақстан Республикасы Парламенті Сенатының Төрағасы Мәулен Әшімбаев. Бұл бастаманы KazChess (Қазақстан шахмат федерациясы) президенті Тимур Турлов қолдады.
Үшінші жыл қатарынан өткізіліп келе жатқан турнир 136 дарынды шахматшыны – жаңадан бастаған ойыншылар мен тәжірибелі шеберлерді бір алаңға тоғыстырды. Жарыс шахматты кеңінен насихаттауға, стратегиялық ойлауды дамытуға және елімізде зияткерлік спорттың өркендеуіне ықпал етуде.
Қатысушылар 26 маусымда Астана қаласында өтетін турнир финалына жолдама алу үшін бақ сынасты.
Жартылай финалдық кезеңді барлық деңгейдегі депутаттардың қолдауымен Қостанай облыстық мәслихаты ұйымдастырды. Турнирдің жоғары деңгейде өтуі өкілді билік органдары мен өңірдің спорт қауымдастығы арасындағы тиімді ынтымақтастықтың нәтижесі болды.
Жарыс қорытындысы бойынша Ақмола облысының өкілдері жоғары нәтиже көрсетіп, жүлделі орындарға ие болды.
«Қоғамдық кеңестер» номинациясында Астрахан ауданынан Келденбек Досбол бірінші орынды иеленсе, Біржан сал ауданынан Айдар Бекмағамбетов екінші орынға тұрақтады.
Денсаулық сақтау саласы өкілдері арасында Көкшетау қаласының тұрғыны Нұрлан Жұматаев екінші орын алды. Ал бұқаралық ақпарат құралдарының өкілдері санатында Қуаныш Иманбаев күміс жүлдегер атанды.
Жартылай финал нәтижесінде 53 қатысушы «Senat Open» III Ашық кубогының финалында өнер көрсету құқығына ие болды. Олардың қатарында Ақмола облысынан 13 шахматшы бар.
Жартылай финалдық жарыстар швейцариялық жүйе бойынша 9 турдан тұрды. Уақыт бақылауы рапид форматында өткізілді: әр партияға 10 минут және әр жүріс үшін қосымша 5 секунд берілді.
«Senat Open» турнирі бүгінде шахмат қауымдастығы үшін ғана емес, еліміздегі зияткерлік спорт пен мәдениетті дамыту үшін де маңызды мәнге ие игі дәстүрге айналды.
Ақпарат көзі : https://www.gov.kz/memleket/entities/maslikhat-aqmola/press/news/details/1241876?lang=ru
Жауап қалдыру Жауапты болдырмау