Сенек ауылының әкімі Нұрмағанбетов Әбжет есеп берді

Сенек ауылының әкімі Әбжет Нұрмағанбетов жергілікті тұрғындармен жүздесіп, ауылдың 2026 жылдың алғашқы бес айындағы әлеуметтік-экономикалық даму барысы мен алдағы жоспарлары туралы егжей-тегжейлі есеп берді. Жыл басынан бері атқарылған ауқымды жұмыстардың қорытындысы ауылдың инфрақұрылымдық әлеуеті мен халықтың тұрмыс сапасының жүйелі түрде артып келе жатқанын айқын көрсетті.

Ауылдық округтің басты жетістіктерінің бірі-тұрғындардың өмірлік маңызы бар ресурстармен толықтай қамтамасыз етілуі. Сөз басында ауыл басшысы Сенек халқының 100 пайыз орталықтандырылған таза ауыз сумен қамтылғанын ерекше атап өтті. Бүгінгі таңда ауыл тұрғындарына бұл бағытта «Тұрмыс-Сервис» мемлекеттік коммуналдық кәсіпорнының арнайы бөлімшесі сапалы қызмет көрсетіп келеді. Ең бастысы, жыл бойына созылатын жүйелі жұмыстың нәтижесінде ауыл тұрғындарына тіршілік нәрі ешбір үзіліссіз, тұрақты түрде беріліп отыр. Бұған қоса, көгілдір отын мәселесі де толық шешімін тауып, ауылдың табиғи газбен қамтылу көрсеткіші де жүз пайыздық межені бағындырған. Бұл көрсеткіштер шалғайдағы елді мекеннің әлеуметтік тұрғыдан толықтай тұрақтанғанын айғақтайды.

Дегенмен, заманауи дамудың негізгі қозғаушы күші болып табылатын жол-көлік инфрақұрылымы мен көшелерді абаттандыру бағытында әлі де болса жүйелі қадамдарды қажет ететін тұстар бар. Сенек ауылішілік автомобиль жолдарының жалпы ұзындығы 14,5 шақырымды құрайды. Қазіргі таңда оның 9 шақырымына асфальт төселіп, заманауи талаптарға сай жаңартылған, бұл жалпы жолдың 62 пайызына тең. Ал қалған 5,5 шақырымы, яғни 38 пайызы әлі де асфальттауды қажет етеді. Бұл мәселе алдағы уақытта кезең-кезеңімен шешімін таппақ.

Ауыл қауіпсіздігі мен түнгі уақыттағы жайлылықты қамтамасыз ететін маңызды бағыт – көшелерді жарықтандыру жұмыстары. Бүгінде Сенек көшелерінде 381 дана заманауи шам жұмыс істеп тұр. Округ басшысы өз баяндамасында елді мекенде әлі де жарықтандыруды қажет ететін учаскелердің бар екенін жасырмады.

Жиын барысында әкім ауылдың күнделікті тіршілігіне, әлеуметтік сала мен тазалық мәселелеріне қатысты өзге де өзекті тақырыптарды кеңінен тарқатты. Есепті кездесудің қорытынды бөлімі дәстүрлі түрде еркін пікір алмасу форматына ұласты. Жиынға жиналған ауыл тұрғындары өздерін мазалап жүрген өзекті сұрақтарын қойып, елді мекенді көркейтуге қатысты ұсыныс-пікірлерін білдірді. Халықтың мұң-мұқтажына құлақ асқан ауыл әкімі Әбжет Нұрмағанбетов көтерілген әрбір мәселенің жіті назарға алынатынын және олардың оңтайлы шешілу жолдары алдағы уақыттағы іс-қимыл жоспарларында міндетті түрде қарастырылатынын жеткізді. Кездесу қорытындысы бойынша тұрғындар тарапынан айтылған ұсыныстардың орындалуы тікелей бақылауға алынды.

Қарақия ауданы әкімдігінің баспасөз қызметі