Жүктілікке және босануға байланысты демалыс және бала күтімі бойынша демалыс: кепілдіктер және заңнамадағы өзгерістер

 

Қазақстан Республикасының заңнамасына сәйкес жұмыскерлерге жүктілікке және босануға байланысты демалыстар, сондай-ақ бала күтімі бойынша демалыстар беріледі. Аталған демалыс түрлері әйелдерді және отбасылық міндеттері бар адамдарды әлеуметтік қорғауды қамтамасыз етуге бағытталған.

Жұмыскерлерге берілетін кепілдіктер

Бала күтімі бойынша демалыс кезеңінде жұмыскердің жұмыс орны (лауазымы) сақталады. Демалыс аяқталғаннан кейін жұмыс беруші жұмыскерге бұрынғы еңбек жағдайларымен жұмысын жалғастыру мүмкіндігін беруге міндетті.

Аталған кепілдіктер меншік нысанына қарамастан барлық жұмыс берушілер үшін міндетті болып табылады.

Жұмыс берушілердің жауапкершілігі

Әйелдердің және отбасылық міндеттері бар жұмыскерлердің еңбек құқықтарын сақтау жұмыс берушінің тікелей міндеті болып табылады. Заңнамада белгіленген кепілдіктерді бұзу Қазақстан Республикасының қолданыстағы заңнамасына сәйкес жауапкершілікке әкеп соғады.

Еңбек құқықтары бұзылған жағдайда жұмыскерлер консультация алу және өздерінің заңды мүдделерін қорғау үшін мемлекеттік еңбек инспекциясының аумақтық бөлімшелеріне жүгінуге құқылы.

Әлеуметтік төлемдерді тағайындау тәртібіндегі өзгерістер

2025 жылғы 8 сәуірден бастап Қазақстан Республикасы Еңбек және халықты әлеуметтік қорғау министрінің 2025 жылғы 18 наурыздағы № 80 бұйрығымен әлеуметтік төлемдерді есептеу қағидаларына енгізілген өзгерістер күшіне енді.

Енгізілген өзгерістерге сәйкес:

• жүктілікке және босануға байланысты әлеуметтік төлемді есептеу кезінде бір айға шаққандағы орташа айлық табыс 7 ең төменгі жалақы мөлшерінен (ЕТЖМ) аспайтын деңгейде, төлеушілер санына қарамастан есепке алынады.

Бұл норма әлеуметтік төлемдерді тағайындау кезінде әділ және бірізді тәсілді қамтамасыз етуге бағытталған.

Жұмыс берушілерге ұсынымдар

Жұмыскерлердің әлеуметтік қорғалу деңгейін арттыру мақсатында Департамент ұжымдық шарттарға Қазақстан Республикасы Еңбек кодексінің 99-бабының 4-тармағының нормасын енгізу мүмкіндігін қарастыруды ұсынады.

Аталған шараларды іске асыру әлеуметтік кепілдіктерді нығайтуға, отбасылық құндылықтарды сақтауға және ұйымдарда қолайлы еңбек жағдайларын жасауға ықпал етеді.

Қорытынды

Ана мен баланы қорғау саласындағы еңбек кепілдіктерін сақтау мемлекеттің әлеуметтік саясатының маңызды элементі болып табылады және жұмыскерлердің жұмыс берушілерге деген сенімін арттыруға ықпал етеді.

 

Ақпарат көзі : https://www.gov.kz/memleket/entities/bko-enbek/press/news/details/1243793?lang=ru