Медицина қызметкерлері күні қарсаңында Қаратоғай ауылында үлкен қуанышты оқиға орын алды! Аудан басшысы Медет Ысқақов Қаратоғай дәрігерлік амбулаториясының ұжымын кәсіби мерекелерімен құттықтап, жаңа УАЗ 3009 жедел жәрдем көлігінің кілтін салтанатты түрде табыс етті. 🤝🔑
Осыдан тура бір жыл бұрын ауыл тұрғындарымен өткен кездесуде дәл осы жедел жәрдем көлігінің қажеттілігі туралы мәселе көтерілген болатын. Бүгін, міне, халықтың өтініші аяқсыз қалмай, оң шешімін тапты. Тұрғындар атқарылған жұмысқа шынайы ризашылықтарын білдіруде.
Қаратоғай ауылында бүгінде 1420 адам тұрады. Ауылдық дәрігерлік амбулаторияның жаңа ғимараты 2014 жылы пайдалануға берілген. Күнделікті халық саулығын күзетуде 9 білікті маман аянбай қызмет етіп келеді.
Жаңа автокөлік амбулатория қызметкерлерінің жеделдігін арттырып, ауыл халқына сапалы әрі қолжетімді медициналық көмек көрсетуге үлкен септігін тигізері сөзсіз. Жаңа көлік құтты, ел игілігіне қызмет ететін жолдары сәтті болсын!
Ақпарат көзі : https://www.gov.kz/memleket/entities/aktobe-martuk/press/news/details/1245404?lang=ru
Жауап қалдыру Жауапты болдырмау